Deputeti i Lëvizjes Vetëvendosje (LVV), Mefail Bajqinovci, ka akuzuar opozitën për një skenar të koordinuar me Listën Serbe gjatë zhvillimeve të së enjtes në Kuvend.
Përmes një postimi në Facebook, Bajqinovci ka thënë se hyrja e deputetëve të Listës Serbe në seancë pas largimit të opozitës tregojnë një përpjekje për të sulmuar LVV-në dhe për të diskredituar punën e qeverisë.
“Koordinim i hatashëm mes Listës Serbe dhe opozitës!
Në Kuvendin e Republikës së Kosovës, u pa qartë një skenar i koordinuar: opozita doli nga seanca dhe më pas në seancë erdhën deputetët e Listës Serbe. Ky ishte një projektim i qartë për të sulmuar Lëvizjen Vetëvendosje, duke pretenduar një bashkëpunim të pavërtetë mes LVV-së dhe Listës Serbe për votimin e ligjeve më të rëndësishme për vendin tonë”, ka shkruar Bajqinovci.
Bajqinovci i quajti këto veprime “të dëshpëruara”, duke shtuar se opozita dhe Lista Serbe po përdorin inskenime dhe dezinformata për të penguar reformat dhe ndryshimet pozitive që po zbatohen nga qeveria aktuale.
“Kjo tregon dëshpërimin e atyre që s’kanë argumente politike dhe përdorin montime, inskenime e dezinformata për të goditur ndryshimet pozitive që po bëhen. Përkundër këtyre përpjekjeve, ju dështoj ky plan i përbashkët Opozitë-Lista Serbe. S’ka kthim mbrapa!”, ka shtuar deputeti i VV-së.
Ndërkaq, gjatë ditës, kryetari i Kuvendit, Glauk Konjufca, ka reaguar ashpër ndaj deputetëve të Listës Serbe, duke i akuzuar ata për provokim para fillimit të seancës dhe keqpërdorim të taksave të qytetarëve.
Ai ka theksuar se kjo sjellje është e papranueshme, dhe ka ndërprerë vazhdimin e seancës të së enjtes.
“Ju drejtohem deputetëve të Listës serbe që vijnë dhe provokojnë në këtë mënyrë, është e pa tolerueshme kjo sjellje se njëherë në gjashtë muaj vini ne kuvend vetëm për me i keqpërdorur taksat e qytetarëve në anën tjetër e luftoni Republikën e Kosovës me çdo mjet që keni, shkoni edhe i rrini gatitun shefit të juaj kriminel Radojçiqit edhe keni guxim të vini në Kuvend , trup të keni edhe kërkojë me ndërpritet seanca”, ka deklaruar Konjufca.
Deputetët e Lëvizjes Vetëvendosje kanë tentuar t’i pengojnë ata të Listës Serbe që të mos futen në sallën e seancave plenare të Kuvendit të enjten pasdite.
Deputetët e VV-së nuk kanë dashur t’i lejojnë brenda sallës me arsyetimin se deputetët e Listës Serbe nuk janë distancuar asnjëherë nga sulmet në veri dhe vijnë në Kuvend vetëm për ta siguruar pagën.
