Deputeti i Kuvendit të Kosovës nga radhët e “Guxo”, Haxhi Avdyli ka folur për aderimin e Doarsa Kica-Xhelilit në Lidhjen Demokratike të Kosovës.
Avdyli në emisionin “Këndi i Debatit”, tha se nuk ka nevojë të bëhet kaq tragjike largimi i Kica-Xhelilit sepse sipas tij, nuk ka ndodhur fundi i botës që ka dalë.
“Mos ta bëjmë kaq tragjike se ka ndodhur fundi i botës që ka dalë. Ka ndodhur edhe në të kaluarën. Çdoherë është normale kur kanë bërë ndërrime. Por e fundit në skenën politike që mundet me kërku apo një ndërrim për çështje parimore është Doarsa Kica. Cili ka qenë ai premtim që partia e saj Guxo e ka thyer?”, ka deklaruar ai.
Sipas tij, Kica-Xhelili nuk e ka votuar ligjin byronë kosovare për konfiskimin e pasurisë
“Paska hi në reformën për drejtësi! Qeveria është duke bërë reformën në drejtësi, Qeveria ka aprovuar ligjin për Byronë për Konfiskimin e Pasurisë të cilën nuk e ka votuar ajo. Qeveria është duke marrë reforma të reja në drejtësi, duke filluar edhe për vettingun”, tha Avdyli.
