Deputeti i grupit parlamentar të Lëvizjes Vetëvendosje, Haxhi Avdyli, i ka kritikuar deputetët e Partisë Demokratike të Kosovës (PDK), për mosvotimin e marrëveshjeve ndërkombëtare.
Avdyli, përmes një postimi në Facebook, ka thënë se deputetët e PDK-së kanë votuar Gjykatën Speciale si dhe marrëveshjen për Asociacionin e komunave me shumicë serbe.
Për këtë, Avdyli thotë se dëmi që ia kanë shkaktuar Kosovës është më i kushtueshëm sesa miliarda euro.
”Po të ishin kaq të vendosur këta deputetët e PDK – së për të mos votuar Gjykatën speciale, e po aq të vendosur që mos ta miratonin marrëveshjen për Asociacionin Serb, ndoshta edhe ua kishim fal kokëfortësinë për mosvotimin e 350 milionëve nga marrëveshjet ndërkombëtare”.
”Në dy rastet votimet i kanë të dëmshme për qytetarët, por dëmin që i kanë bërë funksionalitetit të shtetit tonë me votimet e marrëveshjeve me Serbinë janë më të kushtueshme edhe se miliarda euro. Mos qofsha në lëkurën e tyre”, ka thënë Avdyli.
