Inspektorati i Ministrisë së Mjedisit dhe Planifikimit Hapësinor ka ndërmarrë masa ndaj nëntë gurthyesve që operonin në kundërshtim me ligjin dhe pa dokumentacionin e nevojshëm për ushtrimin e veprimtarisë.
Sipas ministres së Mjedisit dhe Planifikimit Hapësinor, Fitore Pacolli, shtatë prej gurthyesve janë ndalur në komunën e Suharekës, ndërsa dy të tjerë në Skenderaj.
Aksioni i inspektoratit vjen pas analizimit të dosjeve të më shumë se 200 gurthyesve që operojnë në vend. Ministrja Pacolli ka bërë të ditur se kontrollet dhe aksionet në terren do të vazhdojnë edhe në ditët në vijim.
“Çdo subjekt që kapet duke vepruar jashtë ligjit do të përballet me masa”, ka deklaruar Pacolli, duke theksuar se nuk do të ketë tolerim ndaj operatorëve që veprojnë pa lejet dhe dokumentacionin përkatës dhe që cenojnë mjedisin.
Ministria ka paralajmëruar vazhdimin e inspektimeve në terren, me fokus te respektimi i kërkesave ligjore dhe mbrojtja e mjedisit.
