Katër persona janë arrestuar nën dyshimin për përfshirje në veprat penale “mashtrim”, “falsifikim të dokumenteve” dhe “legalizim i përmbajtjes së rreme”, njofton Policia e Kosovës.
Sipas njoftimit, hetuesit nga Drejtoria për Hetimin e Krimeve Ekonomike dhe Korrupsionit (DHKEK), pas një pune operative-hetimore, kanë siguruar prova se të dyshuarit M.M., Sh.B., D.R. dhe B.Zh., përmes dokumenteve të falsifikuara përfshirë pasaportë të Serbisë dhe dokumente të tjera si dhe duke paraqitur një person të rremë si person real, kanë arritur të tjetërsojnë përmes noterit një pronë në pronësi të ankuesit M.T., me sipërfaqe prej 36.28 ari, shkruan IndeksOnline.
Sipas hetimeve, të dyshuarit dyshohet se kanë mashtruar edhe blerësin H.M., duke i prezantuar dokumentacion të rregullt për pronën, ndërsa në këmbim kanë përfituar shumën prej 1,578,180 euro.
Me urdhër verbal të prokurorit të rastit, janë realizuar kontrolle në pesë lokacione të ndryshme, ku janë gjetur dhe sekuestruar 9,000 euro para të gatshme, të cilat do të shërbejnë si provë në procedurat e mëtejme.
Të dyshuarit dyshohet se kanë kryer veprat penale “mashtrim” (neni 323 i KPRK-së), “falsifikim i dokumenteve” (neni 390 i KPRK-së) dhe “legalizim i përmbajtjes së rreme” (neni 395 i KPRK-së).
Të njëjtit janë intervistuar sot në cilësinë e të dyshuarve, në prani të avokatëve mbrojtës, dhe pas konsultimit me prokurorin e rastit nga Prokuroria Themelore në Prishtinë, Departamenti i Përgjithshëm, janë dërguar në procedurë të mëtejme./IndeksOnline/
