Ambasadori britanik: Guximi i Ramadan Nishorit, dritë në errësirë për ata që vuajnë në heshtje
Organizata që merren me të mbijetuarat dhe të mbijetuarit e dhunës seksuale të luftës së fundit në Kosovë kanë lansuar më 14.04.2025 fushatën avokuese “Trauma nuk ka afat”.
E pikërisht në këtë ditë, më 14.04.2025, për herë të parë, një burrë, Ramadan Nishori, ka rrëfyer publikisht dhunën seksuale të përjetuar nga forcat serbe gjatë luftës së viteve 1998-1999.
Me këtë rast, ambasadori i Britanisë së Madhe në Kosovë, Jonathan Hargreaves, vlerësoi daljen publike dhe rrëfimin e Ramadan Nishorit.
Hargreaves tha se nuk janë viktimat ato që duhet të kenë turp, por autorët e krimit.
“Dua të bëj një nderim të veçantë për Ramadan Nishorin, i cili dha dëshminë publike si i pari burrë që ka mbijetuar dhunën seksuale gjatë luftës në Kosovë, dhe gjithashtu të falënderoj familjen e tij për mbështetjen dhe pranimin e tyre”, tha ai.
Lexo po ashtu:
Ai Nishorin e konsideroi hero të Kosovës, duke thënë se guximi për të ndarë përvojën e tij, është dritë në errësirë për ata që vuajnë në heshtje.
Tutje, ambasadori britanik në Kosovë ka kërkuar që afati i komisionit për trajtimin e të mbijetuarve të dhunës seksuale të hiqet në tërësi.
“Ajo që do të dëshironim të shihnim është heqja e afatit në tërësi. Fushata e sotme dërgon një mesazh të fuqishëm për ata që kanë përjetuar dhunë seksuale por që ende nuk janë gati të flasin për të: Kur të jeni gati, Kosova duhet të jetë gati”, deklaroi Hargreaves.
Ai u shpreh se Kosova megjthatë meriton lëvdata për përpjekjet e saja në mbështetjen e të mbijetuarve të dhunës seksuale gjatë luftës.
Ndryshe, lansimi i fushatës u bë në muzeun “Reporting House” (Shtëpia e Gazetarëve) në Prishtinë – në shënim të 14 prillit – Ditës Memoriale të të Mbijetuarve të Dhunës Seksuale të Luftës.
Pjesë e panelit të diskutimit gjatë lansimit të kësaj fushate ishin edhe dy të mbijetuarat e dhunës seksuale gjatë luftës, Vasfije Krasniqi Godman dhe Shyhrete Tahiri Sylejmani, si dhe përfaqësues të organizatave që merren me të mbijetuarit e dhunës seksuale gjatë luftës së fundit në Kosovë.
Një vendim për zgjatje të afatit u mor po të njëjtën ditë, pasi Qeveria e Kosovës ka vendosur më 14.04.2025 që afati për të parashtruar kërkesën për njohjen e statusit të viktimës të dhunës seksuale gjatë luftës të zgjatet edhe për dy vite, deri më 15.05.2027.
Bazuar në deklaratat e zyrtarëve të institucioneve të Kosovës, gjatë luftës së fundit kanë ndodhur rreth 20 mijë raste të dhunimit seksual.
Nga shkurti i vitit 2018, kur ka nisur aplikimi për njohjen e statusit të viktimës, deri në qershor të 2024-ës kanë aplikuar 2 mijë e 83 persona për statusin e viktimës së dhunës seksuale gjatë luftës.
