Një aksident tragjik trafiku ka ndodhur sot në fshatin Galicë të Vushtrrisë, duke i marrë jetën një 59-vjeçari dhe duke lënduar shtatë persona të tjerë.
Sipas njoftimit të Policisë së Kosovës, aksidenti ka ndodhur rreth orës 08:00 të mëngjesit në rrugën lokale të fshatit. Një veturë ka humbur kontrollin dhe ka dalë jashtë rruge, duke shkaktuar lëndime të rënda për drejtuesin e saj, H.S. 59 vjeçar. Ai ndërroi jetë në QKUK rreth orës 11:00, si pasojë e lëndimeve të marra.
Përveç viktimës, shtatë pasagjerë të tjerë në automjet kanë marrë lëndime dhe janë dërguar për trajtim mjekësor.
Hetimet e para të Policisë sugjerojnë se shkaku i aksidentit ishte pakujdesia dhe mospërshtatja e shpejtësisë me kushtet e rrugës. Trupi i viktimës është dërguar në Institutin e Mjekësisë Ligjore për autopsi.
