Lumir Abdixhiku, bashkë me kryesinë e LDK-së, mbajti takim virtual me nëndegët e partisë – në mërgatë.
Në njoftimin e Abdixhikut thuhet se takimi u zhvillua në vijim të ngjarjeve të fundit dhe në përgatitje për hapat e ardhshëm, transmeton IndeksOnline.
“I njoftova për rrjedhën e proceseve negociuese, të cilat fatkeqësisht dështuan, përkundër vullnetit tonë maksimal dhe kërkesave tona minimale – veç demokraci. Por ky dështim nuk është fund; është moment kthese. Dhe atë kthesë e madhe për Lidhjen” shkroi Abdixhiku.
Me këtë rast, Abdixhiku konfirmoi mobilizimin dhe nisjen e menjëhershme të përgatitjeve për tubime në mërgatë.
Ky është njoftimi i plotë i tij:
Në vijim të zhvillimeve të fundit, dhe në përgatitje për hapat e ardhshëm, mbajtëm një takim virtual me të gjitha 88 nëndegët e LDK-së në mërgatë.
I njoftova për rrjedhën e proceseve negociuese, të cilat fatkeqësisht dështuan, përkundër vullnetit tonë maksimal dhe kërkesave tona minimale – veç demokraci. Por ky dështim nuk është fund; është moment kthese. Dhe atë kthesë e madhe per Lidhjen.
Folëm hapur për momentin politik dhe për domosdoshmërinë e bashkimit të së djathtës brenda LDK-së; si rruga e vetme për ta kthyer drejtimin e vendit dhe për të ndërtuar një alternativë të denjë për qytetarët.
U dakorduam për mobilizim të plotë dhe nisjen e menjëhershme të përgatitjeve për tubime e takime në mërgatë. Mërgata jonë nuk është vetëm mbështetje; është pjesë vendimtare e kthesës që po ndërtojmë.
Koha për pritje ka përfunduar.
Koha për veprim ka nisur.
