Kryeministri i Malit të Zi, Dritan Abazoviq, ka thënë të mërkurën gjatë një fjalimi në Kuvend se nuk do të japë dorëheqjen dhe se fjalimi i tij në Srebrenicë “ishte universal”.
Ndaj Abazoviqit janë shtuar thirrjet për dorëheqje pas dy veprimeve të tij, që opozita në Mal të Zi i quan skandale.
Abazoviq po kritikohet për miratimin e marrëveshjes themelore, në bazë të së cilës do të rregullohet marrëdhënia mes shtetit dhe Kishës Ortodokse Serbe. Kjo temë e mundon Malin e Zi tash e shumë vjet, por asnjë kryeministër nuk e kishte çuar deri në fund, pasi Kisha Ortodokse Serbe nuk e njeh Kishën Ortodokse të Malit të Zi.
Abazoviq arsyetoi edhe fjalimin e tij në përvjetorin e gjenocidit të Srebrenicës të shkaktuar nga forcat serbe më 1995, kur u vranë mbi 8300 myslimanë të Bosnjës. Ai gjatë fjalimit tha se “në Srebrenicë nuk janë mbytur myslimanët e Bosnjës, por njerëzimi”.
Kjo nxiti reagime të ashpra në Bosnjë dhe Mal të Zi. Gjatë seancës të së mërkurës, deputetë nga partia e presidentit Milo Gjukanoviq, thanë se “Abazoviqi e ka turpëruar Malin e Zi”.
Por Abazoviq e sheh ndryshe gjithë këtë.
“Kur kam zbritur nga skena, më ka përqafuar një nënë e Srebrenicës. Problem u bënë zgjedhjet në Bosnjë. Problemi është i natyrës tjetër. Problemi është se duhet mbytur frymën kosmopolitane të kryeministrit të Malit të Zi, jo vetëm në Mal të Zi”, tha Abazoviq.
Por me këtë nuk u pajtua deputetja e DPS-së, Draginja Vuksanoviq Stankoviq.
“Në Srebrenicë nuk mbajtët fjalim universal, por atë që ua ka shkruar Aleksandar Vuçiqi”, tha ajo./koha.net
