Aleanca për Ardhmërinë e Kosovës ka shprehur në një reagim shqetësimin lidhur me cilësinë e ujit nga Liqeni i Badocit.
Në komunikatën e dërguar për media, kjo parti ka kërkuar llogari nga KRU Prishtina për mos ndërmarrje të masave për përmirësim të ujit, rolin e Qeverisë në raport me menaxhmentet si dhe atë të ARRU-së për parandalimin e problemit.
“Sipas raportimeve nga KRU Prishtina dhe IKSHPK, uji nga liqeni i Badocit nuk është i sigurt për konsum për shkak të përqendrimeve të larta të manganit, problem që është përsëritur në fund të vitit 2022 dhe fillim të vitit 2023. Megjithatë, as KRU Prishtina dhe as Qeveria e Kosovës nuk kanë ndërmarrë veprime konkrete për të parandaluar përsëritjen e këtij problemi, duke e paraqitur këtë situatë si të zakonshme, pasi ndodh çdo vit”, thuhet në komunikatë për media.
Ata kanë ngrerë kritika për çështjen e shpërndarjes së ujit në cisterna në disa lagje.
“Banorët detyrohen të përshtatin jetën e tyre përreth orareve të shpërndarjes së ujit, duke përjetuar stres dhe shqetësime të vazhdueshme. Përballja e përditshme me sfidën e bartjes së ujit dhe mungesën e furnizimit të qëndrueshëm krijon edhe pasiguri për shëndetin publik, pasi mungesa e furnizimit me ujë të pastër për konsum dhe higjienë mund të çojë në probleme të tjera shëndetësore”, vazhdon reagimi.
