Projektligji për ndryshimin dhe plotësimin e Ligjit për Skemat Pensionale të Financuara nga Shteti nuk ka marrë mbështetjen e deputetëve. Prej 61 deputetëve sa morën pjesë në votim 25 ishin për, 32 deputetë kundër dhe 4 abstenime.
Para se ky propozim të hidhej në votim, deputeti i AAK-së, Shemsedin Dreshaj kërkoi që të gjithë të bashkohen për këtë projektligj.
Sipas tij, kufizimi prej 15 vitesh stazh për të fituar të drejtën si pensionist kontributdhënës ka shkaktuar shumë dëme.
“Ju ftoj pozitë dhe opozitë që ta mbështesim këtë nismë dhe që të largohet ky nen diskriminues nga ligji aktuale. Dua t’ju përkujtoj se ky ligj ka bërë dëm shumë të madh dhe ky ligj përkundër faktit se ekziston një nismë për unifikimin e skemave sociale në Kosovës ky ligj nuk bie ndesh në ligjin për unifikimin, por do t’i ndihmojë”, ka thënë ai.
Nga Qeveria kanë arsyetuar në të kaluarën votën kundër duke thënë se planifikohet reformim i tërësishëm i skemave pensionale.
Dy ditë më parë, ministri i Financave, Punës dhe Transfereve Hekuran Murati, tha se reforma e skemave sociale dhe pensionale është e domosdoshme në Kosovë.
Ai ka shkruar në rrjetin social Facebook se kjo reformë mundësohet nga marrëveshja që si Qeveri kanë nënshkruar me Bankën Botërore (BB), marrëveshje e cila tashmë ka muaj që pret dritën e gjelbër nga Kuvendi i Republikës.
“Shpresoj që një nga punët e para që do të bëjë Kuvendi në sesionin e ri, të jetë ratifikimi i kësaj marrëveshjeje”, tha ai.
Kështu me miratimin e kësaj marrëveshje, të cilën e ka bllokuar opozita, mund t’i i hapet rrugë mandej edhe rregullimit të kufizimi prej 15 vitesh stazh për të fituar të drejtën si pensionist kontributdhënës.
