Kamuflim e ka quajtur opozita punën 1-vjeçare të kryetarit të Prishtinës, Përparim Rama. Ky i fundit ka prezantuar të arriturat gjatë vitit 2022, ku theksoi se janë rritur shërbimet shëndetësore dhe po jetësohet spitali i qytetit.
“Spitali i kryeqytetit po bëhet. Kemi ndarë për ndërtimin e objektit fonde, janë duke u bërë të gjitha matjet dhe analizat e nevojshme për të siguruar mbarëvajtjen e procesit. Punimet për spitalin e kryeqytetit janë duke ecur sipas planit dhe projekti presim të fillojë gjatë vitit 2023”, ka thënë ai.
Rama tha se në fillim të vitit të ardhëm do të fillojë ndërtimi i 3 shkollave dhe 2 çerdheve të reja. Rama ka folur edhe për rigjenerimin e hapësirave të gjelbra dhe për buxhetimin e 7 parqeve të reja.
Anëtari i Kuvendit Komunal të Prishtinës, Gëzim Sveçla, e ka kritikuar punën e kryetarit Rama, duke thënë se as 30 premtime nuk janë realizuar.
“Ja një shembull ku tentoni të bëni një kamuflim të pastër, një devijim nga ajo që keni premtuar. Premtimi ka qenë, lirimi nga pagesa e shfrytëzimit të transportit publik për nxënësit , pensionistët dhe shtresat sociale të ndryshme. Gjendja momentale, gjithmonë sipas raportit tuaj është kjo, për pensionistët dhe rastet sociale linjat e transportit publik janë falas, por jo edhe linjat që mbulohen nga operatorët privatë. Ndërkohë, për nxënës dhe studentë ka zbritje por nuk ka transport falas. Këtë e thoni ju në raport dhe si përfundim këtë e keni klasifikuar si premtim të realizuar. D.m.th. keni premtuar transport pa pagesë për studentë, keni shpjeguar se kjo nuk ka ndodhur, por premtimin e keni llogaritur si të përmbushur”, ka thënë Sveçla.
Në mbledhjen e fundvit për vitin 2022 u votua edhe Rregullorja për orarin e punës dhe mbrojtjen nga ndotja akustike në sektorin e gastronomisë.
