Ambasadori i Shteteve të Bashkuara të Amerikës në Kosovë (ShBA), Jeffrey Hovenier, është parë duke hyrë në zyrën e kryeministrit Albin Kurti të mërkurën.
Kryeministri Kurti dhe Ambasadori Hovenier kanë pasur takime të përjavshme. Situata e krijuar në veriun e Kosovës prej fillimit të dhjetorit është raportuar t’i ketë shpeshtuar ato.
Kurti të martën në një intervistë për prestigjiozen britanike “The Guardian”, ka thënë se rrugët që të çojnë në pikat kufitare në Jarinje e Bërnjak duhet të zhbllokohen. Por ka shqetësim se mund të ndodhin incidente më të rënda gjatë procesit të zhbllokimit të rrugëve.
Ndërkohë, SHBA-ja ka bërë thirrje vazhdimisht për ulje të tensioneve.
Pas dorëheqjes së serbëve nga institucionet e Kosovës, situata në veri ka ngelur e tensionuar. Policia dhe Komisioni Qendror i Zgjedhjeve u sulmuan në përpjekjet e tyre për t’i organizuar zgjedhjet në katër komunat e veriut. Pas tensioneve të shkaktuara, zgjedhjet janë shtyrë për në prill.
Serbët po protestojnë kundër arrestimit të një ish-polici serb të Kosovës, të dyshuar për sulmet ndaj Policisë dhe KQZ-së. Që nga 9 dhjetori, serbët kanë vendosur barrikada në pikat kufitare Jarinje e Bërnjak.
Ambasadori amerikan në Kosovë, Jeffrey Hovenier, ka ripërsëritur se SHBA-ja përkrah integrimin rajonal, evropian dhe euroatlantik të Kosovës.
“Diskutim i madh me liderët e Ministrisë së Jashtme të Kosovës dhe gjithë ambasadorët e Kosovës. Ne kemi ndarë përvojat tona në punë për çështje të jashtme dhe siguri kombëtare, dhe e kam ripërsëritur vizionin e SHBA-së në përkrahje të integrimeve rajonale, evropiane dhe euroatlantike të Kosovës”, ka shkruar Hovenier në Twitter.
