Pasi ditë më parë u mor me pamjen fizike të presidentes Vjosa Osmani, sot deputetja e Partisë Demokratike të Kosovës, Ganimete Musliu, ka vazhduar me fyerjet dhe ofendimet edhe për kreun e ekzekutivit, duke e quajtur kryeministrin Albin Kurti, psikopat.
Madje Musliu ka shkuar edhe më tej, duke fyer e ofenduar edhe gjithë ata që i besojnë kryeministrit, pra mbi gjysmën e popullatës së Kosovës.
Sipas saj, psikopatë janë edhe të gjithë ata që i besojnë Kurtit.
“Ky i ka studiuar mirë, ka ardhë në përfundim që 40% i ka analfabetë funksionalë e pastaj ju ka servuar veç çka kanë pasë qejf ata me degju e me besu. Psikopat bre! Ama duhet me qenë psikopat me i besu një psikopati. Ju ka hupe topi, ju kanë kthy propagandës. Rrenc, mashtrues!”, ka shkruar Musliu në Facebook.
Deputetja Musliu ditë më parë ka përdorur gjuhë të ashpër edhe në drejtim të presidentes së vendit.
“Si presidente ti do të mbahesh në mend veç si inatçore, kompleksgjike, përçarëse dhe urrejtëse deri në palcë! Meqë paske hyrë të kg. Po ta them troç: Do të mbahesh në mend si një GRUA që hyri në Presidencë me 100 kg e do të dalë nga aty me 50 kg”, ka shkruar Musliu.
Ndaj kësaj deklarate ka pasur reagime të shumta. Madje është cilësuar si skandaloze dhe e papranueshme e është kërkuar nga PDK-ja që të distancohet nga gjuha e tillë seksiste, por që ky subjekt ka heshtur ndaj gjithë fyerjeve që po i bën deputetja e saj.
