Sulme e dhunë ndaj pjesëtarëve të Policisë së Kosovës, por edhe asaj të EULEX-it kanë bërë ditëve të fundit në pjesën veriore të vendit grupe të serbëve të nxituara nga Beogradi. E për këtë shkak pati reagime nga gjithë vendet perëndimore dhe u bënë disa arrestime të personave që kryen këto akte kriminale.
Presidenti i Serbisë, Aleksandër Vuçiq, përkundër kërkesave nga vendet perëndimore nuk është bindur që të hiqen barrikadat në veriun e Kosovës. Ai pas mbledhje së Këshillit të Sigurisë, ka thënë se serbët nuk i vendosin barrikadat për “teket e tyre”.
Madje Vuçiqi ka shpërfaqur fytyrën e vërtetë të tij, duke thënë se Serbia po kërkon lirimin e të gjithë serbëve të arrestuar e cila sipas tij, është mënyra për të qetësuar tensionet në veri të Kosovës.
Pas një takimi të Këshillit të Sigurisë Kombëtare, Vuçiq tha se serbët e Kosovës nuk duhet të përfshihen në dhunë kundër trupave të NATO-s dhe anëtarëve të misionit të Bashkimit Evropian atje.
“Askush, në asnjë rrethanë, nuk duhet të marrë pjesë në sulmet ndaj EULEX-it dhe KFOR-it”, tha Vuçiq, ndërsa nuk foli për sulmet e bëra ndaj pjesëtarëve të Policisë së Kosovës.
Në pjesën veriore të vendit, qysh më 10 dhjetor, disa grupe të serbëve lokalë kanë ngritur barrikada dhe kanë bllokuar rrugët që çojnë drejt pikave kufitare me Serbinë, Jarinjë dhe Bërnjak.
Ata e kanë ndërmarrë këtë veprim pasi Policia e Kosovës ka arrestuar ish-policin serb, Dejan Pantiq, nën dyshimet për përfshirje në akte kriminale, respektivisht në sulme kundër zyrtarëve të Komisionit Qendror të Zgjedhjeve në veri të Kosovës dhe atyre policorë.
Zyrtarë të institucioneve të Kosovës, ashtu si edhe ata nga komuniteti ndërkombëtar kanë bërë thirrje për largimin e barrikadave dhe mos vazhdim të shfaqjes së dhunës, pasi ajo nuk do të tolerohet./KosovaNews
