Ministri i Shëndetësisë, Rifat Latifi ka deklaruar të mërkurën se organet e drejtësisë do të merren me rastet e keqpërdorimeve të Fondit të Programit të Trajtimit Mjekësor Jashtë Institucioneve Shëndetësore Publike.
Latifi gjatë raportimit në Komisionin për Shëndetësi ka paralajmëruar “ndryshime serioze” në Bordin e Fondit për Trajtim Jashtë Vendit.
Në komisionin për Shëndetësi ai u shpreh se telashet janë krijuar nga vetë shteti, ndërsa ka potencuar faktin se s’ka kontrata me ndonjë vend tjetër ose spital për t’i bërë shërbimet që në vend nuk i bëjnë.
Latifi ka thënë se pacientët po dërgohen jashtë vendit edhe për trajtime që mund të bëhen në Kosovë.
Sipas tij, tash e 12 vjet është një ekspert nga Australia që vjen për të ndihmuar më sëmundje të fëmijëve, duke pyetur se pse nuk është përgatitur dikush për këtë trajtim që 11 vjet.
Ai ka paralajmëruar masa ndaj atyre që mund ta kenë keqpërdorur pozitën.
“Të gjitha këto që janë shfaqur në media janë shumë problematike. Nëse vetëm edhe një pacient paguan më shumë se sa që duhet, është problematike. Organet përkatëse do të merren me këtë çështje. Bordi i fondit do të ketë ndryshme serioze dhe nëse dikush e ka keqpërdorur pozitën do të përgjigjet. Unë jam tmerruar kur kam shkuar në këtë Fond dhe kam parë në oborr dy dyqane që merren me rekrutimin e pacientëve që i dërgojnë jashtë vendit”, ka thënë ai.
Ai ka thënë se çështja më e rëndësishme në shëndetësi është kujdesi parësor.
Sipas tij, janë gjashtë ligje, 18 udhëzime administrative dhe për secilën nga këto po punojnë grupet punuese. Ai ka thënë se nëse nuk rregullohet legjislacioni dhe mirëqenia e punëtorëve shëndetësorë nuk mund të ketë suksese në Shëndetësi.
Latifi ka thënë se janë duke punuar edhe në infrastrukturën e spitaleve.
“Ne kemi obligim moral që ta bëjmë prioritet shëndetësinë. Ne duhet ta luftojmë bazën për luftimin e konflikteve të interesit. Klinika Onkologjike ka bërë punë të jashtëzakonshme por i mungon hapësira dhe stafi teknik. Të gjitha këto duhet kohë të adresohen”, ka thënë ai.
