Deputetët e Kuvendit të Kosovës gjatë seancës së sotme në Kuvend, janë solidarizuar me gratë të prekura nga kanceri i gjirit dhe po ashtu duke tërhequr vëmendje në diagnostikimin e hershëm të këtij lloj kanceri.
Albana Bytyçi, deputete e AAK-së, gjatë fjalimit të saj ka tërhequr vëmendjen duke vendosur shaminë si shenjë simboli për muajin e ndërgjegjësimit të kancerit të gjirit.
“Ky muaj, nga fillimi e deri në fund është inkurajim për të gjithë qytetarët, organizatat, bizneset e grupet tjera që të bashkohen në aktivitete për të rritur ndërgjegjësimin për të kontrolluar dhe parandaluar kancerin e gjirit”, tha Bytyçi.
Duke thënë se 1 nga 8 gra mund të preken nga kanceri i gjirit, deputetja në fjalë u shpreh se i mbështesin këto gra në luftën e tyre kundër kancerit të gjirit.
“1 në 8 gra mund të preken nga kanceri i gjirit gjatë jetës së tyre. Dhe për shumë prej tyre, diagnoza e kancerit të gjirit është si një luftë me të cilën po përballen vetëm. Por, ne jemi bashkë në këtë luftë. Sepse ju jeni nënat tona, motrat tona, vajzat tona, jeni pjesë e shoqërisë sonë“.
Sipas saj, kjo çështje kapërcen parti e politikë, për qëndrueshmërinë e jashtëzakonshme të të mbijetuarave të kancerit të gjirit, duke kujtuar ato që humbën jetën nga kjo sëmundje.
Më poshtë mund të gjeni fjalimin e plotë të deputetës Albana Bytyçi:
Të nderuar deputetë, Të nderuara gra,
Kjo shami që po mbaj me vete dhe që të njejtën ua dhashë secilës grua deputete këtu në sallë, shënon një simbolikë të muajit ku thirrjet më të mëdha u bëhen po grave, por jo vetëm, për të bërë ekzaminim klinik të gjirit/mamografinë.
Ky muaj, nga fillimi e deri në fund është inkurajim për të gjithë qytetarët, organizatat, bizneset e grupet tjera që të bashkohen në aktivitete për të rritur ndërgjegjësimin për të kontrolluar dhe parandaluar kancerin e gjirit.
Siç e dimë dhe shumë familje e kanë përjetuar, kanceri i gjirit mund të shkatërrojë jetë përgjithmonë. Megjithëse në Klinikën e Onkologjisë në QKUK nuk kam parë ende statistika se sa pacientë humbin betejën me kancer brenda vitit, një nga rastet më të shpeshta të vdekjeve sipas të dhënave nga Organizata Botërore e Shëndetësisë është pikërisht kanceri i gjirit.
1 në 8 gra mund të preken nga kanceri i gjirit gjatë jetës së tyre. Dhe për shumë prej tyre, diagnoza e kancerit të gjirit është si një luftë me të cilën po përballen vetëm. Por, ne jemi bashkë në këtë luftë. Sepse ju jeni nënat tona, motrat tona, vajzat tona, jeni pjesë e shoqërisë sonë.
Secila prej jush vleni dhe secila histori e juaja është frymëzim për ne. Çdo zë i ngritur i yni sjell ndryshim pozitiv për të tashmen dhe të ardhmen tonë.
Prandaj, përkushtimi ynë në ngritje të ndërgjegjësimit është prej gjërave më të mëdha që mund të bëjmë – si individë dhe si komb. Falë trajtimit klinik dhe zbulimin e terapive të reja, numri i të mbijetuarave nga kanceri i gjirit është trefishuar në 60 vitet e fundit, mirëpo ne duhet të përpiqemi edhe më shumë se bashku me mediat dhe gjitha që ceka më lart të shpërndajmë informacion dhe të edukojmë secilën vajzë dhe grua për rëndësinë e shëndetit të gjirit.
Kjo çështje kapërcen parti e politikë, për qëndrueshmërinë e jashtëzakonshme të të mbijetuarave të kancerit të gjirit, duke kujtuar ato që humbën jetën nga kjo sëmundje, si dhe duke ngushëlluar e dhënë forcë atyre grave që aktualisht po e luftojnë kancerin e gjirit.
Pranë jush, duke ju mbështetur dhe duke kërkuar vendosmërinë tuaj, inkurajoj të gjitha gratë të bëjnë kontroll, sepse çdo zbulim i hershëm mund të shpëtojë jetë!
