Kryeministri Kurti, në audiencën e Universitetit të Kembrixhit, foli për gjendjen në të cilën ndodhet Kosova, duke u zgjeruar edhe në rajon e më gjerë.
Kryeministri Kurti në fillim të diskutimit të tij foli për intervenimin e NATO-s në Kosovë për të ndalur gjenocidin e shtetit serb ndaj popullit shqiptar. Ai me këtë rast përmendi pasojat që populli shqiptar i përjetoi gjatë luftës në Kosovë, duke përmendur në shifra konkretë vrasjet, dhunimet, djegiet e shtëpive, etj.
“Perëndimi demokratik dëshironte që ta ndalte këtë gjenocid”, theksoi mes tjerash kryeministri Kurti.
Kurti foli për sfidat që po e përcjellin rrugëtimin e Kosovës drejt integrimeve evropiane.
Ai përmendi qendrën ruse në Nish, duke thënë “ironikisht quhet ‘Qendra Humanitare’, duke dëshiruar të bëhet baraspesha e intervenimit të NATO-s në Kosovë, kështu dhe këta tani e quajnë qendrën ruse si ‘Qendra Humanitare'”.
Kryeministri Kurti shtoi se veç kësaj, ata duan që Kosova të jetë shtet i dështuar, duke e konsideruar si ndërhyrje e përkohshme e NATO-s.
“Ashtu sikundër e vlerësonin ndërhyrjen e NATO-s në Irak e Afganistan si storje jo e suksesshme, ashtu ta konsideronin edhe Kosovën, si ndërhyrje të përkohshme”, deklaroi Kurti.
Prandaj, është me rëndësi që të mbrohet Kosova, të mbrohet përparimi, shtoi ai.
“Aq sa mbron NATO-ja Kosovën, nuk kam pretendime tejet të larta që Kosova mbron NATO-n po ashtu, sepse jemi pjesë e historisë së kaluar, të tashmen, por edhe të ardhmen”, deklaroi Kurti.
Kryeministri Kurti më tej foli për situatën në Ukrainë, duke i ndërlidhur me gjendjen në Kosovë-Serbi dhe rajon.
Pos tjerash, ai foli për qasjen që Kosova e Serbia kanë kundrejt Perëndimit dhe Lindjes (Rusisë). Ai përmendi ushtrimet ushtarake të përbashkëta mes Serbisë dhe Rusisë “Vëllazërimi dhe mburoja Sllave”, ndërkohë që Kosova ka një qasje krejt tjetër, e cila ka marrë pjesë në ushtrime të përbashkëta me forcat e NATO-s.
Tutje, ai vuri në pah ndikimin e Rusisë në Serbi edhe në pushtet. Por edhe rrezikun që ky ndikim të shtrihet edhe më gjerë në rajon, më konkretisht në BeH , në Mal të Zi, etj.
Kryeministri Kurti foli edhe për pengesat që tre shtetet fqinje, të cilët janë anëtarë të NATO-s, kanë penguar fluturimin e Lavrovit për në Serbi, që, sipas tij, është një goditje e dytë më e madhe ndaj Kremlinit.
Më tej kryeministri Kurti u pyet edhe për kohën sa qëndroi në burg gjatë luftës në Kosovë.
“Nuk jam i hidhëruar pse isha i burgosur, ndonëse nuk di si u dukem te tjerëve, por burgu më ka bërë të kuptoj më mirë, njerëzit e sistemet politike, duke më larguar nga studimet në shkencat ekzakte”, deklaroi mes tjerash kryeministri Kurti në një audiencë në Universitetin e Kembrixhit.
Ndërkaq audienca, me pyetjet që i parashtruan shprehnin një interesim të shtuar mbi gjendjen në Kosovë, në sigurinë e saj dhe në rajon, në sundimin e ligjit, në luftën kundër korrupsionit, në integrimin e serbëve të Kosovës në institucionet shtetërore, në integrimin e Kosovës në KE, BE dhe NATO, etj./rtk/
