Kryeministri i Kosovës, Albin Kurti i dënoi sulmet me raketa ruse të së hënës në gjithë Ukrainën, më të mëdhatë që kur filloi lufta, duke thënë se shtetet që kërkojnë bashkëpunim me Rusinë në mes të kësaj lufte të tmerrshme janë bashkëpunëtore në pasojat e saj.
Me anë të një postimi në rrjetin social Twitter, Kurti ka thënë se i bashkohet ShBA-së, BE-së dhe aleatëve të tjerë në dënimin e sulmit të Rusisë ndaj civilëve në Ukrainë.
“I bashkohem SHBA-së, BE-së dhe aleatëve tanë të tjerë në dënimin e sulmeve brutale të Rusisë në zonat civile në mbarë Ukrainën. Sot, bota demokratike duhet ta thotë njëzëri: Çdo shtet që kërkon bashkëpunim me Rusinë në mes të kësaj lufte të tmerrshme është bashkëpunëtor në pasojat e saj”, ka shkruar Kurti.
I join the U.S., EU, and our other allies in condemning Russia’s brutal strikes on civilian areas across Ukraine. Today, the democratic world must speak with one voice: Any state that seeks cooperation w/ Russia in the midst of this horrific war is complicit in its consequences.
— Albin Kurti (@albinkurti) October 11, 2022
Një ndër shtetet e vetme evropiane që po vazhdon bashkëpunimin me Rusinë është Serbia, të cilës aleatët ndërkombëtarë ia kanë kërkuar shkëputjen e bashkëpunimit.
Ambasadori amerikan në Serbi, Christopher Hill, i ka bërë apel Serbisë që të largohet nga varësia e gazit dhe naftës ruse.
Shtetet e Bashkuara kanë ofruar më shumë se 16.8 miliardë dollarë ndihmë amerikane për sigurinë e Ukrainës që kur Rusia filloi agresionin ndaj fqinjit të saj që më 24 shkurt dhe ka vendosi një gamë të gjerë sanksionesh ekonomike ndaj Moskës për veprimet e saj në Ukrainë.
