Ministrja e Arsimit, Arbërie Nagavci, të hënën u ka bërë thirrje komunave që ta trajtojnë më seriozisht çështjen e psikologëve në shkolla.
“Si Ministri e Arsimit bëjmë thirrje tek komunat që në kuadër të përgjegjësive të tyre, këtë çështje ta trajtojnë me seriozitet, të shpallin konkurset dhe të mos pranojnë kuadër tjetër për pozitat të cilat i kanë të lejuara për psikologë”, ka shkruar Nagavci.
Ministrja shtoi se Qeveria ka të miratuara 520 pozita për psikologë shkollorë, por për që më pak se 1/3 e tyre janë të punësuar.
Komuna e Prishtinës i ka në dispozicion 66 pozita për psikologë e pedagogë, por aktualisht janë vetëm 4 pedagogë dhe rreth 12 psikologë të punësuar në shkollat e Prishtinës.
Kujtojmë se sot është hapur konkursi për 25 psikologë në shkolla në kryeqytet.
