Lëvizja Vetëvendosje ka publikuar sërish një VIDEO përmes së cilës ka përmendur ish-pushtetarë e deputetë, për të cilët ka thënë se kishin përvetësuar terminale doganore.
Vetëvendosje ka shkruar se në Republikën e Kosovës terminalet në çdo cep të saj kanë qenë në pronësi private të lidhura ngushtë me politikën.
Sipas Vetëvendosjes, 37 milionë euro i kanë përvetësuar për 1 vjet vetëm prej 10 terminaleve.
“370 milionë euro për 10 vjet prej këtyre Terminaleve. Ndërkaq tash Qeveria Kurti ka filluar kthimin e terminaleve në shtet prej nga do të përfitojë Republika”, thuhet në njoftim.
Lëvizja Vetëvendosje e ka përmendur deputeten e PDK-së, Margarita Kadriun, për të cilën ka thënë se kishte fituar një terminal doganor në këmbim të votës për presidentin.
Tutje janë përmendur djemtë e Isa Mustafës, mandej Sami Lushtaku dhe Devollët, të cilët sipas Vetëvendosjes kanë privatizuar terminale doganore.
“Drejtësia. Shteti. Publikja. Shoqërorja. Të gjitha mbi sloganin e vjetër familja, prona, shteti”, ka shkruar tutje VV-ja.
