Kryeministri Albin Kurti, ka thënë se ka përfunduar kalendari për konsultime publike në lidhje me Ligjin për Paga dhe se profesionistët shëndetësorë e kanë atë që e meritojnë maksimalisht në rrethanat dhe mundësitë ekzistuese.
Ai tha se përveç pagës dhe shtesave të tjera, profesionistët shëndetësorë që vendosin të punojnë vetëm në sektorin publik do ta kenë edhe shtesën e veçantë.
“Ndërsa, sa i përket profesionistëve të huaj shëndetësorë, sidomos atyre që janë nga mërgata dhe trojet shqiptare, ne u bëjmë thirrje atyre që të inkuadrohen në sistemin tonë shëndetësor në mënyrë që ta rrisim edhe cilësinë edhe t’i plotësojmë zbrazëtitë që i kemi por edhe gjithashtu kontributin e tyre i cili është më shumë spontant ta bëjnë institucional”, është shprehur Kurti.
Tutje, ai tha se nuk merret me punësime e me emra të veçantë, por sipas tij, qeveria krijon mundësi e vendos parime, udhëheqet nga vlerat dhe siç tha ai “më pas të tjerët aplikojnë, kandidojnë, pranohen, punojnë, kontribuojnë”.
Kryeministri i Kosovës, Albin Kurti, ka thënë se nuk është zgjidhje për largimin e profesionistëve shëndetësorë nga Kosova, vetëm duke u munduar të ndalohet ikja e tyre.
Kurti ka thënë se zgjidhje është edhe kthimi i tyre, dhe beson se kjo është e mundur.
“Ne besojmë që zgjidhje nuk është vetëm duke provuar që ta ndalosh dikë që të shkojë por të përpiqesh që t’i kthesh ata që kanë shkuar sepse unë besojnë se është e mundshme një gjë e tillë. Nëse përjetojmë një gjendje të panikut ku e konsiderojmë fatale shkuarjen e dikujt, do ta kemi të vështirë ta kthejmë”, ka thënë Kurti gjatë seancës së Kuvendit të Kosovës të premten, i pyetur nga deputeti i PDK-së, Bekim Haxhiu, se çka do të bëjë Qeveria për ta ndalë ikjen e mjekëve.
