Deputeti i Lëvizjes Vetëvendosje, Jahja Kokaj, në Kuvendin e Kosovës ka bërë sërish thirrje për ndërprerjen e grevës.
Ai ka thënë se dëmet që u shkaktohen fëmijëve janë të mëdha, ndërsa ato i ka shpjeguar edhe shkencërisht.
“Ato mijëra orë të humbura, gjenerojnë një kuantitet, cilësi, e aq vlerë të madhe sa jam i trishtuar. Nuk më zë gjumi natën duke e ditur konsekuencën që e kemi në ardhmëri të fëmijëve, brezave e kombit tonë. Duhet të ndajë këtë pjesë, meqenëse është i bazuar në neuroshkencë kjo që po flas”, ka thënë Kokaj. “Ka qenë mirë që grevat të ndërpriten që dje, por edhe që sonte është mirë. Me gjitha aftësitë e mia i luta dje udhëheqësit e këshillit grevist që ta ndërpresin grevën. Unë po flas tash jo si parlamentar, por si një njeri që kam dhënë mësim, si mësues, babë apo qytetar, kam lutje që të ndërpritet urgjent greva. Është fjalë goje, por nëse e thua me argumente të caktuara, mënyra konkrete se si dëmtohen aftësitë kognitive e emocionale të fëmijëve…”
Ai ka thënë se për ndërtimtari kosovarët janë të parët në rajon, porse për aftësi intelektuale të fundit.
“Sot erdha prej Gjakovës e pash me kënaqësi të veçantë një rrokaqiell aty, kam parë në Hong Kong e Ne] York të tillë. Palosjen e tullave e shtrirje të asfaltit jemi kampion në këtë pjesë të Evropës. Por, në ndërtimin e njerëzve, prosperitetin tonë intelektual jemi të fundit”, ka thënë Kokaj.
Ai ka thënë se u ka bërë me dije edhe këshillit grevistë që nëse ndërprejnë grevën, ai vetë do t’u bashkohet ballë grevës për kërkesa të tyre.
