Qeveria e republikës së Kosovës u ka dhënë edhe dy muaj kohë të gjithë pronarëve të veturave me targa të lëshuara nga Serbia në emër të qyteteve të Kosovës, që t’i ndërrojnë ato me RKS.
E në kuadër të përgatitjeve për këtë proces të kalimit nga targat legale në ato të shtetit të Kosovës, sot shefja e kabinetit të ministrit të MPB-së, Jeta Tela së bashku me zyrtarë tjerë nga ministria, vizituan Qendrat e Regjistrimit të Automjeteve në veri të vendit.
Bëhet e ditur se gjatë kësaj vizite Tela u njoftua për së afërmi me procesin e përgatitjes për regjistrimin e veturave dhe kthimin e targave nga ato ilegale në targat RKS.
“Të gjitha përgatitjet operacionale ishin gati dhe me këtë rast Ministria e Punëve të Brendshme ftoj të gjithë shtetasit e Republikës së Kosovës që të vazhdojnë të regjistrojnë veturat e tyre në QRA-të përkatëse, duke përfituar nga lehtësirat e parapara në këtë proces i cili do të zgjatë deri me datën 31 tetor të këtij viti”, thuhet në njoftim.
Gjithashtu Tela gjatë kësaj vizite falënderoi të gjithë zyrtarët e angazhuar që me përkushtim po ofrojnë informacionet e nevojshme për qytetarët e interesuar.
Në këtë rast, Ministria e Punëve të Brendshme njofton të gjithë qytetarët e Republikës së Kosovës se fushata e informimit do të vazhdojë në mënyrë intensive gjatë ditëve dhe javëve në vazhdim anë e mbanë Kosovës.
Kujtojmë se në marrjen e vendimit për targat ilegale nga Qeveria, kryeministri i Kosovës, Albin Kurti ka thënë se ky vendim ka kanë qenë në kuadër të ushtrimit të sovranitetit të Kosovës.
Më 1 shtator ka hyrë në fuqi vendimi i Qeverisë së Kosovës për targat. Ky vendim konsiston në riregjistrimin e makinave që përdorin targa të lëshuara nga Serbia.
Vlerësohet se 10.000 targa me akronime të qyteteve të Kosovës – sikurse PZ, KM, PR, UR e të ngjashme – qarkullojnë në veriun e banuar me shumicë serbe.
Qeveria ka argumentuar se qytetarët do të kenë afat prej dy muajsh për t’i riregjistruar makinat në targa RKS- Republika e Kosovës. Serbia ka propozuar që serbët në veri të pajisen me targa KS – që kanë status neutral ndaj shtetësisë së Kosovës – por, Kurti ka hedhur poshtë këtë propozim.
