Kryeministri i Kosovës, Albin Kurti, ka folur për vizitën e presidentit të Turqisë, Rexhep Tayyip Erdogan, në Ballkan, në kuadër të së cilës nuk e vizitoi Kosovën.
Sipas tij, kjo vizitë e presidentit turk kësaj radhe lidhet me Bosnjën.
“Ata i kanë agjendat e tyre dhe ne Turqinë e kemi shtet, mik e aleat. Turqia është shtet shumë i fuqishëm në NATO, por dialogu që zhvillohet mes Kosovës e Serbisë, tash Kosova nuk është aty temë, por është palë bëhet me ndërmjetësim të Brukselit dhe ndihmohet nga ShBA-ja. Nesër vijnë përfaqësuesit specialë nga Berlini dhe Parisi që do ta shoqërojnë Lajçakun, ndihma e gjitha shteteve mike është e mirëseardhur. Por, tash agjendat se kur vizitojnë e ku burrështetasit e shteteve mike, nuk mund ta kuptojmë plotësisht. Përshtypja ime është se jo vizitë kishte më tepër të bënte me Bosnjën sepse e konsiderojnë vend shumë më të rrezikuar se Kosova, andaj edhe vizita ishte në Serbi dhe Kroaci. Sepse Serbia dhe Kroacia kanë ndikime të fuqishme në Bosnjë. Vizita në Ballkan kësaj radhe e presidentit turk lidhet me Bosnjë. Nuk është se ne mund ta dimë qind për qind, ku, çka, kush shkon”, tha Kurti.
