Prokuroria Themelore në Gjilan, ka ngritur aktakuzë ndaj ish-drejtorit të Drejtorisë për Arsim, Shëndetësi, Kulturë, Rini dhe Sport, në Komunën e Ranillugut, Ivan Mitkoviç, duke e akuzuar atë për mosdeklarim të pasurisë.
Aktakuza në fjalë e siguruar nga “Betimi për Drejtësi”, rezulton të jetë ngritur në qershor të këtij viti, ku pretendohet se i akuzuari nuk e ka deklaruar pasurinë e tij sipas ligjit, përkatësisht atë e ka deklaruar me vonesë, edhe pse paraprakisht ka qenë i informuar ta bëjë një gjë të tillë.
Kjo aktakuzë është dorëzuar në Gjykatën Themelore në Gjilan, dega në Kamenicë, për të cilin rast ende nuk është caktuar shqyrtimi fillestar.
Ndryshe, Prokuroria Themelore në Gjilan, më 27 qershor 2022, ka ngritur aktakuzë ndaj Ivan Mitkoviç, me arsyetimin se ai nga 1 deri më 31 mars 2022, në cilësinë e drejtorit të Drejtorisë për Arsim, Shëndetësi, Kulturë, Rini dhe Sport në Komunën e Ranillugut, ka qenë i detyruar ta bëjë deklarimin e pasurisë për vitin 2021, mirëpo i njëjti këtë nuk e ka bërë.
Sipas prokurorisë, Mitkoviç më 20 qershor 2022, në Agjencinë Kundër Korrupsionit (AKK), pas afatit të paraparë ka paraqitur formularin për deklarimin dhe prejardhjen e pasurisë pa ndonjë arsye valide për vonesë, raporton Betimi për Drejtësi”.
Me këtë, Ivan Mitkoviç, po akuzohet se ka kryer veprën penale “Mos raportimi ose raportimi i rremë i pasurisë, i të ardhurave, i dhuratave, i dobisë tjetër materiale ose detyrimeve financiare”, nga neni 430, paragrafi 1 të Kodit Penal, vepër kjo e dënueshme me gjobë ose me burgim deri në tre vjet.
Vepra penale “Mosraportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”, është vepër e cila hyn në kuadër të kapitullit “Korrupsioni zyrtar dhe veprat penale kundër detyrës zyrtare” të Kodit Penal të Republikës së Kosovës.
