Sindikata e Bashkuar e Arsimit, Shkencës dhe Kulturës nuk do të tërhiqet nga greva e nisur më 25 gusht, pavarësisht që Qeveria vendosi t’i ndajë nga 50 euro në muaj për secilin zyrtar publik nga shtatori deri në fund të vitit aktual fiskal. SBASHK-u po i kërkon nga 100 euro çdo muaj deri në miratimin dhe hyrjen në fuqi të Ligjit për Paga.
Ymer Ymeri, koordiator në këtë sindikatë, ka thënë se ndarja nga 50 euro është ndihmë dhe jo plotësim i kërkesës së sindikatave.
“Çdo ndihmë që ndan kryeministri për punëtorët dhe për të gjithë qytetarët e Kosovës e mirëpresim ndihmën, por kryeministri nuk është marrë fare me kërkesat tona. Ne kemi kërkuar rritje të pagës bazë deri në 100 euro deri në fillimin e implementimit të Ligjit të Pagave. Vendimi i kryeministrit për pakon emergjente për shkak të inflacionit është i mirëseardhur, por nuk ka asnjë lëvizje në drejtim të plotësimit të kërkesave tona kështu që deri në një vendim tjetër të plotësimit të kërkesave jemi në ato qëndrime dhe veprime sindikale që i kemi filluar me datën 25. Greva vazhdon sepse ai ka ofruar ndihma, nuk ka rritur paga”, ka thënë Ymeri.
Ymeri ka thënë se mbajtja e konferencës së kryeministrit të shtunën “tregon që ai dëshiron të marrë vendime të njëanshme”.
Përfaqësues të Bashkimit të Sindikatave të Pavarura pritet të takohen pasdite me presidenten Vjosa Osmani dhe përfaqësues të Qeverisë.
Edhe kryeministri Albin Kurti në konferencë u shpreh se vendimi për ndihmë s’është plotësim i kërkesës së sindikatave, por ndihmë për të tejkaluar krizën financiare. Ai kritikoi SBASHK-un dhe sindikatat tjera për “kërkesa irracionale”.
Zyrtarët publikë që ishin në grevë ende s’i kanë marrë pagat e muajit gusht. Qeveria pati kërkuar nga komunat dorëzimin e listave të përditësuara me emrat e zyrtarëve që ishin në grevë nga 25 gushti me qëllimin që t’u ndalet pjesa e ditëve kur nuk punuan, por komunat kanë refuzuar ta bënin këtë. Ministri i Financave, Hekuran Murati, u shpreh të shtunën se Qeveria do të procedojë me ndarjen e mjeteve për shkak “të situatës së rëndë ekonomike”, por paralajmëroi masa ndaj zyrtarëve komunalë që kanë refuzuar dorëzimin e listave./Koha/
