Një mësimdhënëse e gjuhës angleze në SHME “Gjin Gazulli” në Prishtinë, është deklaruar kundër grevës së thirrur nga SBASHK-u.
Shkëndije Emrullahu-Kasumi, ka cekur arsyet për të cilat është kundër grevës.
“Askush nuk ka të drejtë t’ua ndalojë fëmijëve mësimin. As edhe njëherë të vetme nuk e kam pëlqyer kohën, e në theks të veçantë mënyrën se si SBASHK-u i paraqet kërkesat e punëtorëve të arsimit. Asnjëherë nuk do të përkrahi humbjen e mësimit, asnjëherë. (Mua mësimin ma ka ndërpre serbi, unë asnjëherë nuk do ta bëjë të njëjtën për askënd, e aq më pak për fëmijët e popullit tim.)”, ka shkruar Emrullahu-Kasumi në Facebook.
Ajo ka thënë se është për rritje të pagave, duke marrë parasysh rritjen e çmimeve, por thotë se kjo kërkesë ka mundur të bëhet më me dinjitet.
“Nuk ka fare kreativitet nga ana e përfaqësuesve të SBASHK-ut. Është vetëm forma klasike thënë më së buti, që po e dëgjojmë tash e sa vjet. Shpresoj që dikujt t’i kujtohet që ndoshta Këshilli i Prindërve mund të ndihmojë, e ne të punojmë, ta mbajmë mësimin, përderisa prindërit (natyrisht, ata që munden) të protestojnë për ne. I tërë ky proces, të jetë i organizuar mirë dhe pa ofendime e gjuhë të ulët, ashtu siç u ka hije mësimdhënësve”, ka shkruar Emrullahu-Kasumi.
“Shpresoj që mësimdhënësit e mi, shumica prej tyre pensionerë, të na falin mundin e tyre, të papaguar gjatë viteve 90-ta!”.
