Prokuroria Themelore në Prishtinë ka dhënë detaje lidhur me rastin e të shtënave me armë zjarri që ndodhi mbrëmjen e 16 qershorit në rrugën “Feriz Guri” në Prishtinë, ku një person mbeti i plagosur.
Sipas Prokurorisë, ngjarja ka ndodhur rreth orës 23:30, ndërsa viktima është dërguar për trajtim mjekësor në Qendrën Klinike Universitare të Kosovës.
“Në rrugën ‘Feriz Guri’ në Prishtinë, ka pasur të shtëna me armë zjarri, si pasojë e të cilave një person ka pësuar lëndime trupore dhe është dërguar për tretman mjekësor në Qendrën Klinike Universitare të Kosovës”, thuhet në njoftimin e Prokurorisë.
Tutje bëhet e ditur se menjëherë pas marrjes së informatës, prokurori kujdestar i Departamentit për Krime të Rënda, së bashku me njësitet përkatëse policore, kanë ndërmarrë veprimet e nevojshme hetimore dhe kanë siguruar provat materiale në vendin e ngjarjes.
“Gjatë veprimeve hetimore të ndërmarra deri më tani, dyshohet se personi me inicialet N.B., ka kryer veprën penale ‘Vrasje në tentativë’”, thuhet më tej në njoftim.
Prokuroria njofton se me urdhër të Prokurorit të Shtetit është kryer bastisje, gjatë së cilës janë gjetur dhe sekuestruar një armë e gjatë, shtatë gëzhoja dhe 13 fishekë.
“Me urdhër të Prokurorit të Shtetit, është kryer bastisja nga Policia e Kosovës, ku aty është gjetur një armë e gjatë, shtatë gëzhoja dhe trembëdhjetë fishekë, të cilat do të shërbejnë si prova materiale gjatë zhvillimit të procedurës hetimore”, thuhet në komunikatë.
Ndërkohë, gjatë ekzaminimeve të kryera nga njësitet kompetente, në automjetin e viktimës me inicialet Sh.K. është gjetur dhe sekuestruar një armë zjarri së bashku me 12 fishekë.
“Është konstatuar se në automjetin e viktimës, Sh.K., është gjetur dhe sekuestruar një armë dhe dymbëdhjetë fishekë”, thuhet në njoftim.
Prokuroria Themelore në Prishtinë ka bërë të ditur se, në koordinim me Policinë e Kosovës, po vazhdon hetimet për zbardhjen e plotë të rrethanave të rastit dhe arrestimin e personit të dyshuar.
