Ministri në detyrë i Financave, Hekuran Murati, ka bërë të ditur se janë ekzekutuar pagesat për përfituesit që kanë plotësuar kriteret për mbështetjen e njëhershme të punëtorëve të sektorit privat.
Përmes një postimi, Murati tha se pagesat janë realizuar në kuadër të Pakos për Përballje me Inflacionin 2.0, ashtu siç ishte paralajmëruar më herët.
Ai ka njoftuar gjithashtu se komisioni vlerësues është duke vazhduar punën për masën e mbështetjes për studentët, ndërsa listat përfundimtare do të publikohen sapo të jenë gati për ekzekutim.
“Pagesat për përfituesit që kanë plotësuar kriteret për mbështetje të njëhershme të punëtorëve të sektorit privat, në kuadër të Pakos për Përballje me Inflacionin 2.0, tashmë janë ekzekutuar, ashtu siç patëm paralajmëruar”, ka shkruar Murati.
Sipas tij, për masën e studentëve, qytetarët do të njoftohen pas përfundimit të procesit të vlerësimit.
Postimi i Plotë:
Pagesat për përfituesit që kanë plotësuar kriteret për mbështetje të njëhershme të punëtorëve të sektorit privat, në kuadër të Pakos për Përballje me Inflacionin 2.0, tashmë janë ekzekutuar, ashtu siç patëm paralajmëruar.
Ndërkohë, për masën e mbështetjes së studentëve komisioni vlerësues po vijon punën dhe do t’ju njoftojmë sapo listat të jenë gati për ekzekutim.
