Gjashtë raste të dhunës në familje janë raportuar nga Policia e Kosovës, se kanë ndodhur të hënën në vende të ndryshme në Kosovë.
Sipas njoftimit të së martës, dy raste kanë ndodhur në Prizren, një në Prishtinë, një në Fushë-Kosovë, një në Gjakovë dhe një në Vushtrri.
Në një rast të Prishtinës, një grua ka raportuar se është sulmuar fizikisht nga vëllai i saj.
“Viktima femër kosovare ka raportuar se pas një mosmarrëveshje verbale është sulmuar fizikisht nga vëllai i saj. Palët janë intervistuar dhe me vendim të Prokurorit, i dyshuari është arrestuar dhe dërguar në mbajtje, rasti është duke u hetuar”, thuhet në njoftim.
Në njëri rast në Prizren, raportohet se një person e ka sulmuar gruan.
“Ankuesja, kosovare, ka raportuar se gjatë periudhës së lartpërmendur, i dyshuari me të cilin bashkëjeton, ka ushtruar dhunë fizike ndaj saj, duke i shkaktuar lëndime trupore. Rasti në procedurë hetimore”, thuhet në njoftim.
Në rastin e Gjakovës, policia ka njoftuar se një person, në gjendje të dehur ka ushtruar dhunë ndaj bashkëshortes dhe vajzës së tij.
“Është arrestuar i dyshuari, pasi që në gjendje të dehur ka ushtruar dhunë ndaj bashkëshortes dhe vajzës së tij. Me vendim të prokurorit, i dyshuari është dërguar në mbajtje”, thuhet në njoftim.
Ndërkaq në rastin e Vushtrrisë, sipas njoftimit të policisë, një person ka ushtruar dhunë fizike ndaj bashkëshortes dhe motrës së bashkëshortes.
“Është arrestuar i dyshuari, pasi që ka ushtruar dhunën ndaj bashkëshortes dhe motrës së bashkëshortes. Viktimat kanë pranuar tretman mjekësor. Me vendim të prokurorit, i dyshuari është liruar dhe rasti shkon në procedurë të rregullt”, thuhet në njoftimin e policisë të martën.
