Komuna e Fushë Kosovës do të organizojë një program festiv me rastin e 12 Qershorit – Ditës së Çlirimit të Fushë Kosovës.
Aktiviteti do të mbahet më 12 qershor, duke filluar nga ora 19:00, në ambientet e Shkollës Fillore dhe të Mesme të Ulët “Mihal Grameno”, ku qytetarët do të kenë mundësinë të bëhen pjesë e një mbrëmjeje kushtuar përkujtimit të kësaj date të rëndësishme historike.
Sipas organizatorëve, aktiviteti synon të nderojë sakrificën e të gjithë atyre që kontribuuan për lirinë e vendit, si dhe të promovojë vlerat e lirisë, unitetit dhe përparimit të Fushë Kosovës.
“Ky organizim do të jetë një moment i veçantë për të kujtuar dhe nderuar sakrificën e të gjithë atyre që kontribuuan për lirinë e vendit tonë, si dhe për të festuar së bashku vlerat e lirisë, unitetit dhe përparimit të Fushë Kosovës”, thuhet në njoftimin e organizatorëve.
Autoritetet komunale kanë ftuar qytetarët që të marrin pjesë në këtë aktivitet për të shënuar së bashku Ditën e Çlirimit të Fushë Kosovës.
