Nuk ndalen sulmet mes Ukrainës dhe Rusisë. Dronët e Kievit goditën një muze historik në Sevastopol, në Krimenë e aneksuar nga Rusia, bënë të ditur autoritetet lokale, të cilat reduktuan shërbimet hekurudhore gjatë natës përballë intensifikimit të sulmeve ajrore.
Muzeu i goditur përkujton Luftën e Krimesë në vitet 1853–1856, mes Perandorisë Ruse dhe një koalicioni që përfshinte Perandorinë Osmane, shkruan A2 CNN.
Guvernatori i instaluar nga Rusia në Sevastopol njoftoi në Telegram se çatia e muzeut kishte marrë flakë, por nuk ofroi detaje të mëtejshme mbi dëmet apo viktimat. “Armiku do të paguajë për sakrilegjin”, tha guvernatori Razvozhayev në postimin e tij.
Ndërkohë, në pjesë të tjera të Krimesë, autoritetet reduktuan numrin e trenave gjatë orëve të natës, pasi një sulm me dronë plagosi drejtuesin e një treni dhe vrau asistentin e tij.
Në shënjestër u vu gjithashtu edhe rajoni i Samarës në Rusi, ku u godit një nyje e rëndësishme e industrisë së naftës në lumin Vollga, zonë ku ndodhen rafineri të shumta të kontrolluara nga gjigandi i naftës Rosneft. Autoritetet u bënë thirrje banorëve të Samarës të kërkonin strehim, ndërsa transporti publik u pezullua pas aktivizimit të sirenave të alarmit.
Sulmet e vazhdueshme të Ukrainës ndaj infrastrukturës energjetike në Rusi kanë detyruar Moskën të kufizojë prodhimin e naftës, ndërkohë që vendi mbetet prodhuesi i tretë më i madh i naftës në botë.
Në rajonin jugor të Rostovit, pranë kufirit me Ukrainën, copat e një droni të rrëzuar shkaktuan zjarr në një cisternë nafte në një zonë civile, ndërsa në rajonin qendror të Vladimirit dy struktura industriale morën flakë.
Në total, Rusia deklaroi se rrëzoi 326 dronë gjatë natës, me disa dhjetëra prej tyre që ishin drejtuar drejt Moskës.
