Kandidati për kryeministër nga Lëvizja Vetëvendosje, Albin Kurti, ka deklaruar se në mandatin e ardhshëm do të investohen rreth 1 miliard euro në ushtri, duke theksuar rëndësinë e forcimit të kapaciteteve të mbrojtjes.
Në një intervistë për RTK, Kurti foli edhe për sloganin e fushatës “Pika”, të cilin e cilësoi si simbol të përmbylljes së një periudhe dhe hapjes së një kapitulli të ri politik, duke thënë se “nga shtet për disa, tash është shtet për krejt”.
Ai përmendi edhe proceset e fundit zgjedhore, duke theksuar se gjatë një viti e gjysmë janë mbajtur pesë palë zgjedhje, përfshirë zgjedhje parlamentare dhe lokale.
Kurti foli gjithashtu për pjesëmarrjen e diasporës, duke thënë se bashkatdhetarët kanë votuar me postë dhe në përfaqësitë diplomatike, shpesh me radhë të gjata pritjeje.
Sipas tij, Kosova ka “mbi 1.6 milionë arsye” për të vazhduar me politikën “shtet për krejt”, duke përfshirë qytetarët brenda vendit dhe bashkatdhetarët jashtë tij.
Ai u shpreh optimist për procesin zgjedhor, duke thënë se pret rritje dhe një përmbyllje të suksesshme të zgjedhjeve.
