Një person është arrestuar nga policia në Ferizaj nën dyshimin për kryerjen e veprave penale “Lëndim i rëndë trupor” dhe “Kanosje”, pas një incidenti të ndodhur në rrugën magjistrale Prishtinë–Shkup.
Sipas Policisë së Kosovës, rasti ka ndodhur më 15 maj 2026, kur i dyshuari me inicialet R.S. dyshohet se fillimisht ka tejkaluar dhe bllokuar me automjetin e tij viktimën A.T., e më pas e ka sulmuar fizikisht, duke i shkaktuar lëndime të rënda trupore.
Viktima ka marrë trajtim mjekësor në Qendrën Emergjente të Spitalit të Ferizajt.
Gjatë hetimeve, policia ka intervistuar edhe vajzën e viktimës, e cila njëkohësisht është ish-bashkëshortja e të dyshuarit. Ajo ka deklaruar se është kanosur përmes telefonit nga R.S., ndërsa si dëshmi ka dorëzuar dy audio-incizime ku dëgjohen kërcënimet e dyshuara.
Policia njofton se i dyshuari është intervistuar në prani të avokatit mbrojtës dhe ka pranuar kryerjen e veprave penale.
Me vendim të prokurorit të shtetit, ndaj tij është iniciuar rasti për veprat penale “Lëndim i rëndë trupor” dhe “Kanosja”, ndërsa është dërguar në mbajtje për 48 orë.
