Rusia ka rifilluar sulmet me dronë ndaj Ukrainës vetëm pak orë pas përfundimit të armëpushimit të përkohshëm triditor, njoftuan autoritetet ukrainase në orët e para të mëngjesit të sotëm.
Sipas Forcave Ajrore të Ukrainës, gjatë natës u regjistruan sulme me dronë ndaj kryeqytetit Kiev si dhe ndaj qyteteve Zaporizhia, Dnipro, Kharkiv dhe Kherson.
Në shënjestër ishin gjithashtu rajonet Sumy dhe Mykolaiv.
Shefi i administratës ushtarake të Kievit, Tymur Tkachenko, deklaroi në Telegram se mbetjet e një droni ranë mbi çatinë e një ndërtese banimi 20-katëshe në kryeqytet.
Deri tani nuk ka raportime të menjëhershme për viktima apo dëme të mëdha materiale.
Media ukrainase “The Kyiv Independent” raportoi gjithashtu shpërthime në qytet gjatë natës.
Nga ana tjetër, autoritetet ruse thanë se edhe Ukraina rifilloi sulmet me dronë me rreze të gjatë veprimi pas mesnatës.
Agjencia ruse e aviacionit civil, Rosaviatsiya, njoftoi se trafiku ajror në disa aeroporte të Rusisë qendrore u kufizua për arsye sigurie.
Ushtria ruse deklaroi se kishte interceptuar 27 dronë ukrainas deri në mëngjes, ndërsa nuk u publikuan menjëherë informacione për dëme.
Armëpushimi tre-ditor, i cili kishte hyrë në fuqi të shtunën, ishte propozuar javën e kaluar nga presidenti amerikan Donald Trump, i cili u kishte kërkuar presidentit rus Vladimir Putin dhe presidentit ukrainas Volodymyr Zelenskyy të ndalonin përkohësisht luftimet.
Armëpushimi përkoi me ceremonitë në Rusi për përvjetorin e fitores së Bashkimit Sovjetik ndaj Gjermanisë naziste në Luftën e Dytë Botërore/ atsh
