Ministri i Bujqësisë, Faton Peci, deklaroi se sivjet, deri më tani janë 16.593 fermerë kanë përfituar grante në fushën e bujqësisë, nga programi që kap vlerën e 26 milionë eurove.
Ai tha të dielën para mediave se nisja e procesimit të subvencioneve u bë në javën e tretë të gushtit, duke shtuar se ka nisur edhe procesi i pagesave direkte.
Peci shtoi se procesi i aplikimit për grante është mbyllur javën e kaluar.
“Në bashkëpunim me shoqëritë civile, kemi bërë një shpallje publike për të gjithë përfaqësuesit e shoqërisë civile dhe njerëzit e fushave, që të jenë pjesë e monitorimit, në programin që kap vlerën e mbi 26 milionë eurove”, tha ai.
Sipas ministrit të Bujqësisë, do të realizohet pagesë edhe për të gjithë bujqit që do të deponojnë sasi të grurit tek mullinjtë. Çmimi do të jetë tre cent për secilin kilogram.
Ministria e Bujqësisë, Pylltarisë dhe Zhvillimit Rural ditë më parë ka filluar procedimin e pagesave për përfituesit e subvencioneve në kuadër të Programit për Pagesa Direkte 2022 për çdo kulturë bujqësore, shkruan KosovaNews.
Ministri i Bujqësisë, Pylltarisë dhe Zhvillimit Rural, Faton Peci përmes një konference për media njoftoi se për një periudhë dy javore MBPZhR-ja ka proceduar për pagesë gjithsej 24.9 milionë euro për bujqit përfitues në kuadër të Programit për Pagesa Direkte 2022/ Subvencione.
