Një sasi e konsiderueshme mallrash të kontrabanduara është sekuestruar nga Policia e Kosovës në një depo të dyshuar në Ferizaj.
Sipas njoftimit zyrtar, aksioni është zhvilluar më 5 maj nga Njësia e Task Forcës-DRK Jug, pas pranimit të informatave për aktivitet të paligjshëm. Gjatë operacionit, është identifikuar një i dyshuar mashkull kosovar, i cili dyshohet se ka shfrytëzuar depon për magazinimin e mallrave të kontrabanduara, të futura ilegalisht nga Maqedonia e Veriut në Kosovë.
Pas sigurimit të urdhrit nga prokurori kompetent, policia ka kryer kontroll në lokacionin e dyshuar, ku janë sekuestruar 800.4 kilogramë duhan i përpunuar, 94 kilogramë mjaltë, mbi 200 kilogramë materiale ambalazhi, si dhe pajisje për përpunimin e duhanit dhe ambalazhit.
Vlera e përafërt e mallrave të sekuestruara llogaritet rreth 16,500 euro, ndërsa shmangiet nga akciza dhe detyrimet doganore kapin shifrën prej rreth 34,000 euro. Mallrat e konfiskuara janë proceduar tek Dogana e Kosovës për veprime të mëtejshme.
