Ministri i Mbrojtjes i Gjermanisë, Boris Pistorius, ka komentuar vendimin e Shteteve të Bashkuara të Amerikës për të tërhequr një pjesë të trupave të saj nga Evropa, duke e cilësuar atë si një zhvillim të parashikueshëm.
Pistorius theksoi se evropianët duhet të marrin më shumë përgjegjësi për sigurinë e kontinentit dhe se ka nevojë urgjente për forcimin e kapaciteteve mbrojtëse evropiane, raporton Skynews.
Sipas tij, ky vendim është pjesë e një procesi më të gjerë, ku Evropa duhet të përqendrohet në rritjen e vetëpërgjegjësisë dhe në zhvillimin e kapaciteteve të saj ushtarake. “Ishte e parashikueshme që SHBA do të tërhiqte trupat nga Evropa, përfshirë edhe Gjermaninë,” ka thënë Pistorius.
Në përgjigje të këtij ndryshimi, ai njoftoi se Gjermania do të intensifikojë bashkëpunimin me “Grupin e Pesëve”, një aleancë e përbërë nga Mbretëria e Bashkuar, Franca, Italia dhe Polonia, për misionet e sigurisë dhe mbrojtjes që do të zhvillohen në të ardhmen.
Ndërkohë, Pentagoni ka konfirmuar planet për të tërhequr rreth 5000 trupa amerikane nga territori gjerman si pjesë e një rishikimi më të gjerë të pranisë ushtarake amerikane në Evropë.
Kjo tërheqje është planifikuar të realizohet brenda një periudhe 6-12 muajsh dhe është pjesë e një strategjie të re që synon të riorganizojë praninë ushtarake të SHBA në kontinentin evropian.
Gjermania ka luajtur një rol kyç në praninë ushtarake amerikane në Evropë për dekada, duke shërbyer si një bazë logjistike dhe operacionale për misionet e NATO-s dhe operacionet amerikane në shumë rajone të botës.
Tërheqja e trupave nga Evropa është pjesë e një ndryshimi të qëndrueshëm në strategjinë e sigurisë amerikane, që mund të ketë pasoja për praninë ushtarake të SHBA në rajon.
