Ministri i Bujqësisë, Pylltarisë dhe Zhvillimit Rural, Armend Muja, ka miratuar Vendimin për Kornizat Gjithëpërfshirëse Orientuese për hartimin e programeve mbështetëse në sektorin e bujqësisë dhe zhvillimit rural për vitin 2026.
Ky vendim strategjik, i përgatitur nën udhëheqjen e Ministrit Muja, vendos bazat e një qasjeje të re, të strukturuar dhe afatgjatë për zhvillimin e sektorit bujqësor, duke përcaktuar prioritetet kyçe dhe drejtimet orientuese për mbështetje publike, në përputhje me kornizën buxhetore dhe legjislacionin në fuqi.
Në komunikatë për media thuhet se qëllimi i këtij vendimi është ndërtimi i një sistemi të qëndrueshëm dhe gjithëpërfshirës të mbështetjes për fermerët dhe ndërmarrjet bujqësore, duke synuar rritjen e të ardhurave, përmirësimin e produktivitetit, nxitjen e investimeve dhe forcimin e zhvillimit rural, si dhe stabilitetin e tregut bujqësor.
Buxheti i përgjithshëm i programit për vitin 2026 arrin në 77.5 milionë euro dhe është i organizuar në tre shtylla kryesore:
- Programi për Pagesa Direkte (59.5 milionë euro), që garanton mbështetje të drejtpërdrejtë për fermerët përmes pagesave bazë për të ardhura, pagesave rishpërndarëse dhe mbështetjes së lidhur me prodhimin për sektorë strategjikë si blegtoria, qumështi, drithërat, pemtaria, perimet, vreshtaria dhe bletaria, si dhe përmes eko-skemave për praktika të qëndrueshme mjedisore.
- Programi i Zhvillimit Rural (10 milionë euro), i orientuar drejt rritjes së konkurrueshmërisë përmes modernizimit të fermave, zhvillimit të kapaciteteve përpunuese dhe forcimit të zinxhirit të vlerës në zonat rurale.
- Masat për Stabilizimin e Tregut (mbi 8 milionë euro), të dizajnuara për të adresuar luhatjet e tregut dhe për të ulur kostot e prodhimit përmes mbështetjes për inpute bujqësore dhe ndërhyrjeve të synuara në sektorë prioritarë.
Vendimi vendos gjithashtu standarde të larta të disiplinës buxhetore dhe menaxhimit financiar, duke përcaktuar kufij të qartë të shpenzimeve dhe mekanizma proporcionalë për shpërndarjen e drejtë të mbështetjes në rast të tejkalimit të kërkesës.
Për zbatimin efikas dhe në kohë, Ministri Muja ka vendosur themelimin e tre grupeve të specializuara punuese, të cilat do të hartojnë programet dhe aktet nënligjore përkatëse për secilin komponent, duke garantuar transparencë, qartësi procedurale dhe përputhje të plotë me standardet ligjore.
Ministria e Bujqësisë, Pylltarisë dhe Zhvillimit Rural, në bashkëpunim me Agjencinë për Zhvillimin e Bujqësisë dhe institucionet relevante, do të sigurojë monitorim të vazhdueshëm dhe raportim periodik mbi zbatimin e programeve, duke garantuar llogaridhënie dhe rezultate konkrete për sektorin.
Ky vendim përfaqëson një hap të rëndësishëm drejt transformimit dhe modernizimit të bujqësisë, duke e pozicionuar sektorin si një shtyllë kyçe të zhvillimit ekonomik dhe qëndrueshmërisë rural
