Presidenti i Malit të Zi Jakov Milatoviç dhe Presidenti i Këshillit Evropian António Costa kanë dërguar një letër të përbashkët ftese për pjesëmarrje në Samitin BE-Ballkani Perëndimor, i cili do të mbahet më 5 qershor në Tivat. Presidenti i Malit të Zi deklaroi se samiti përfaqëson një moment historik, pasi do të organizohet për herë të parë në Mal të Zi, “gjë që i jep vendit tonë rolin e organizatorit të një prej tubimeve më të rëndësishme politike dhe strategjike midis Bashkimit Evropian dhe Ballkanit Perëndimor”.
“Kështu, Mali i Zi konfirmon pozicionin e tij si një partner i besueshëm dhe aktor aktiv i procesit evropian, si dhe një urë lidhëse midis rajonit dhe Bashkimit Evropian”, thuhet në njoftimin për shtyp.
Letra iu drejtua udhëheqësve të shteteve anëtare të BE-së dhe vendeve të rajonit, “me qëllim pjesëmarrjen e tyre në këtë takim të rëndësishëm që bashkon udhëheqësit evropianë në një kohë kur politika e zgjerimit është përsëri në krye të axhendës së Bashkimit Evropian”.
“Tema qendrore e samitit do të jetë prosperiteti dhe stabiliteti i përbashkët i Bashkimit Evropian dhe i Ballkanit Perëndimor, gjë që pasqyron qartë momentumin e ripërtërirë politik dhe faktin se politika e zgjerimit është e gjallë, dinamike dhe strategjikisht e rëndësishme për të ardhmen e kontinentit evropian”, thuhet në njoftimin për shtyp.
Programi zyrtar i samitit fillon më 5 qershor dhe përfshin dy seanca kryesore: një takim plenar dhe një drekë pune.
Është sqaruar se takimi plenar do t’i kushtohet progresit në integrimin e Ballkanit Perëndimor në BE dhe Planit të Rritjes, duke forcuar njëkohësisht stabilitetin rajonal, lidhshmërinë dhe qëndrueshmërinë, ndërsa dreka e punës do të përqendrohet në politikën e zgjerimit, sfidat dhe mundësitë kryesore, si dhe në përafrimin me politikat dhe standardet evropiane, duke konfirmuar se zgjerimi mbetet një nga çështjet kryesore strategjike të Bashkimit Evropian.
“Në kontekstin e 20-vjetorit të rivendosjes së pavarësisë së Malit të Zi, u dërgua një ftesë për darkën ceremoniale më 4 qershor, e cila do të shënojë simbolikisht këtë jubile të rëndësishëm në frymën e partneritetit evropian dhe vlerave të përbashkëta”, theksohet në njoftimin për shtyp.
