Në përvjetorin e 28-të të Epopesë së Dukagjinit, në Gllogjan ka qëndruar kryetarja e Kuvendit të Kosovës, Albulena Haxhiu e cila ka bërë homazhe pranë varrezave të dëshmorëve në kompleksin memorial “Dëshmorët e Kombit” në Gllogjan.
Kryekuvendarja, thotë se para 28 vitesh, Gllogjani u rrethua me qëllimin që të shuhej një vatër e rezistencës, por ajo që ndodhi ishte e kundërta.
“Familja Haradinaj, bashkë me luftëtarët e asaj ane, e çanë rrethimin dhe dëshmuan se përpjekja jonë për liri nuk rrethohet, nuk ndalet dhe nuk thyhet. Sot përkulemi me nderim para Gazmend Mehmetajt, Agron Mehmetajt dhe Himë Haradinajt, të cilët dhanë gjithçka që ne sot të jetojmë të lirë”, thotë Haxhiu.
Kryetarja e Kuvendit të Republikës tha se sakrifica e të rënëve e bëri të mundur lirinë.
“Kujtojmë familjet e tyre, dhimbjen dhe krenarinë që mbajnë, dhe i falënderojmë me përulësi. Nderojmë familjen Haradinaj, luftëtarët e UÇK-së dhe çdo njeri që, me sakrificën e vet, e bëri të mundur lirinë e vendit tonë”, tha ajo.
