Kryeministri i Kosovës, Albin Kurti tani i pret në takim emisarin e Bashkimit Evropian për dialogun Kosovë-Serbi, Miroslav Lajçak dhe të dërguarin e ShBA-së për Ballkanin Perëndimor, Gabriel Escobar.
Escobar e nisi vizitën e tij në Kosovës të martën ku ka zhvilluar takim me presidenten Vjosa Osmanin e pastaj edhe me liderët opozitarë.
E sot Escobar së bashku Lajçak pas takimit me Osmanin po mbajnë një takim tjetër edhe me kryeministrin Albin Kurti dhe zëvendëskryeministrin Besnik BIslimi.
Kujtojmë se kanë mbetur edhe tetë ditë deri më 1 shtator, kur Kosova, sipas Qeverisë, do të nisë zbatimin e vendimeve për riregjistrimin e automjeteve me targa serbe në RKS – Republika e Kosovës – dhe lëshimin e dokumenteve hyrëse/dalëse për shtetasit serbë.
Por, është ende e paqartë nëse Kosova dhe Serbia do të mund të merren vesh për këto çështje, të cilat i kanë rritur tensionet në fillim të këtij muaji.
Autoritetet e Kosovës kanë bërë përpjekje t’i zbatojnë këto vendime nga 1 gushti, por disa serbë në pjesën veriore kanë ngritur barrikada në shenjë pakënaqësie.
Me sugjerimin e partnerëve ndërkombëtarë, Qeveria e Kosovës ka vendosur të shtyjë zbatimin e vendimeve të saj për 30 ditë.
Për shkak të situatës së krijuar, i dërguari i posaçëm i SHBA-së për Ballkanin Perëndimor, Gabriel Escobar, dje ka ardhur në Kosovë dhe sot së bashku me përfaqësuesin e posaçëm të Bashkimit Evropian në dialogun Prishtinë – Beograd, Mirosllav Lajçak, po zhvillon takime të shumta.
Qëllim i tyre është që të bisedojnë me palët për arritjen e një marrëveshjeje të mundshme, përpara 1 shtatorit.
Javën e kaluar, kryeministri i Kosovës, Albin Kurti, dhe presidenti i Serbisë, Aleksandar Vuçiq, janë takuar në selinë e Bashkimit Evropian, por nuk kanë arritur marrëveshje.
Pala serbe ka këmbëngulur që qytetarët nga veriu i Kosovës të përjashtohen nga vendimi për dokumentet e reja dhe që automjetet e tyre t’i riregjistrojnë me shkronja neutrale ndaj statusit të Kosovës – KS, e jo RKS.
E sot Kryeministri Albin Kurti ka qenë i prerë lidhur me këtë çështje.
Ai tha se nuk do të pranojnë rikthimin në qarkullim të targave KS të UNMIK-ut për veturat që qarkullojnë brenda territorit të Kosovës, si dhe është e vendosur dhe do të zbatojnë masa në përputhje me të drejtën ndërkombëtare për masa reciproke si gjithë shtetet e pavarura.
“Targat me akronimet ilegale dhe ato me KS nuk ka nevojë dhe nuk mund të rikthehen më në qarkullim. Qeveria e Republikës së Kosovës e konsideron Kosovën si shtet sovran dhe buron prej kësaj shtetësie dhe këtij sovraniteti dhe nuk mund të legjitimojë neutralitet vetanak ndaj vetë statusit të saj, sepse njëri prej opsioneve ka qenë që ne të prodhojmë targa neutrale”, tregoi Kurti.
Ai theksoi se Republika e Kosovës nuk prodhon targa të UNMIK-ut dhe kjo do të jetë e pamundur sa të jetë në udhëheqje të Qeverisë.
“Opsionet që janë të pranueshme për ne janë sipas kushtetutës ligjeve dhe në parimet e reciprocitetit. Kërkesat që Kosova të prodhoj targa neutrale nuk vijnë në konsiderim me mua si kryeministër. RKS janë tabelat e Kosovës. Dhe kjo është në përputhje me zotimet e Beogradit në Bruksel dhe ata nuk duhet të prodhojnë targa me akronime të tilla. Targa të UNIMIK nuk prodhon Republika e Kosovës. Unë nuk do të isha kryeministër po të mos ishte Kosova shtet e Republikë dhe s’ka si të jetë ndryshe”, është shprehur Kurti.
Kryeministri Kurti ka kujtuar faktin se Kosova nuk mund të marrë vendime që e vënë në pikëpyetje pavarësinë e vendit, ndërsa tha se është i mjaftueshëm konsesioni që vendimi që do të duhej të zbatohej më 1 gusht të shtyhet për 1 shtator./KosovaNews/
