Gjuha ka përplasur Malin e Zi e Serbinë të premten duke e shtyrë atë të parën ta thërrasë ambasadorin serb për sqarim. Përplasja u nxit pasi Zyra për Diplomaci Publike dhe Kulturore e Qeverisë së Serbisë deklaroi se mbi 43% e qytetarëve malazias deklarojnë se flasin gjuhën serbe, derisa 34% deklarohen për gjuhën malaziase. Përplasjet pasuan në rrjetin social “X”.
Pas postimit të Zyrës së Qeverisë serbe, Ministria e Jashtme e Serbisë qe e shpejtë në reagim. Ajo njoftoi se u thirr ambasadori serb dhe se me të u theksua se komunikimi i tillë është i papranueshëm, se çështje të tilla bien direkt brenda kornizës kushtetuese dhe ligjore të Malit të Zi.
E, Ministria e Jashtme e Serbisë iu përgjigj. Ajo përmes një replike në “X” ka thënë se deklarata e MPJ-së malaziase është shembull tipik se si futen marrëdhëniet dypalëshe mes Serbisë e Malit të Zi në kontekstin e politikës ditore. Ajo e ka akuzuar Malin e Zi se gjithë situatën e ka nxjerrë nga konteksti qëllimisht.
Ministria serbe u arsyetua se postimi në llogarinë joformale të zyrës së qeverisë nuk e ka prekur rendin kushtetues apo ligjor të Malit të Zi, por “me një dozë të shëndetshme humori vuri në dukje faktin e njohur mirë se gjuha serbe është pjesë e identitetit të një numri të konsiderueshëm qytetarësh të Malit të Zi.
Të shtunën, edhe një herë Ministria e Punëve të Jashtme të Malit të Zi i reagoi të duke thënë se ministria e Serbisë po përdor argumentet e njëjtë që çuan deri te thirrja e ambasadorit serb, derisa i ka rikujtuar standardet themelore të respektimit të institucioneve malaziase dhe rendit të brendshëm.
Në reagimin e saj është theksuar se komunikimi i përgjegjshëm nga adresat zyrtare nuk janë çështje e interpretimit por se përfaqëson standardin minimal në marrëdhëniet ndërkombëtare.
“Përpjekjet për të interpretuar në mënyrë selektive kategoritë kushtetuese ose për t’i shndërruar ato në narrative ‘humoristike’ nuk e ndryshojnë realitetin, përkundrazi e shfaq instrumentalizimin politik. Ndërhyrja e vazhdueshme në punët e brendshme të Malit të Zi, duke shpërfillur faktet, standardet kushtetuese dhe rolin e institucioneve, nuk mund të konsiderohet shprehje e shqetësimit, por më tepër formë e presionit politik”, thuhet në reagimin e MPJ-së të Malit të Zi
