Ish-ambasadori i OSBE-së në Kosovë gjatë luftës, William Walker, ka vlerësuar lart zhvillimin demokratik të Kosovës, duke thënë se, ashtu siç është e strukturuar dhe funksionon sot, Kosova është “pa dyshim ndër vendet më demokratike në botë”.
Gjatë një fjalimi përkujtimor për masakrën e Reçakut, Walker tha se transformimi i Kosovës në vetëm 27 vjet është i jashtëzakonshëm dhe se dikur do të dukej e paimagjinueshme ekzistenca e një Republike të Kosovës së pavarur.
“Dua të them disa fjalë për ata që meritojnë merita për atë që ndodhi pas masakrës së Reçakut. Kam dëgjuar fjalë lavdërimi, me të drejtë, për UÇK-në, për ata që fluturuan me bombardues të NATO-s dhe prodhuan atë që shohim sot. Dhe pa dyshim, nëse më kishit thënë 27 vjet më parë se do të qëndroja sot përballë një kryeministri dhe një presidenti të Republikës së Kosovës së pavarur dhe të zgjedhur në mënyrë demokratike, do t’ju kisha thënë se jeni të çmendur. Ajo që përfaqësoni të gjithë ju për mua është fakti se kaq shumë gjëra kanë ndryshuar në vetëm 27 vjet. Këtë desha vetëm ta përmend kalimthi”, deklaroi ish ambasadori i OSBE-së.
Ai theksoi gjithashtu kontributin e vullnetarëve të Misionit të Verifikimit të OSBE-së në Kosovë, të ardhur nga mbi 30 shtete, të cilët shërbyen pa armë dhe pa mbrojtje në një kohë shumë të rrezikshme, për t’i treguar botës se çfarë po ndodhte në Kosovë.
“Ajo që dua gjithashtu të përmend është kjo… Një grup njerëzish që mendoj se meritojnë shumë respekt dhe mirënjohje për atë që bënë për ta bërë të mundur shfaqjen e Republikës së Kosovës ashtu siç është sot, por që rrallë përmenden në fjalimet që dëgjoj, qoftë këtu apo jashtë Kosovës, janë ata që erdhën me mua, që erdhën për të shërbyer në Kosovë kur ajo ishte ende një vend shumë i rrezikshëm. Dhe këta janë vullnetarët që erdhën nga mbi 30 shtete, anëtarë të OSBE-së. Deri në kohën kur u larguam, vetëm tre muaj pasi kishim ardhur dhe kishim tentuar të ngrinim misionin, deri në 1.200 vullnetarë erdhën nga shtetet anëtare të OSBE-së. Ky ishte Misioni i Verifikimit të Kosovës”,
“Kështu që këta njerëz, të rinj dhe të moshuar, erdhën me shumë aftësi, me shumë për t’i ofruar popullit të Kosovës, dhe me shumë për të ofruar në kuptimin e kryerjes së asaj për të cilën ishin dërguar këtu, që ishte të verifikonin se cila palë po bënte çfarë ndaj cilës palë. Unë vërtet nuk dëgjoj shumë për kontributin e shumë e shumë vullnetarëve të vendeve motra të Evropës që erdhën këtu për t’i treguar botës se çfarë po ndodhte. Ata erdhën këtu pa asnjë mbrojtje. Misioni nuk kishte armë. Ndoshta ne ishim të vetmit njerëz në Kosovë që po silleshim përreth dhe po përpiqeshim të shihnim se çfarë po ndodhte, të paarmatosur, të pambrojtur. Shpesh dëgjoj për guximin tim ose për aftësinë time për të ardhur këtu”, theksoi Walker.
Walker u shpreh se çdo vizitë në Kosovë e lë të impresionuar nga përparimi i arritur që nga pavarësia, duke e cilësuar zhvillimin demokratik të vendit si një “mrekulli” të ndërtuar nga vetë populli i Kosovës.
“Kur shkoj nëpër Shtetet e Bashkuara dhe flas para audiencash si kjo, audiencash të njerëzve që dinë shumë pak për Kosovën. Çfarë ka ndodhur në 20 vitet e fundit, 25 vitet, 27 vitet, por veçanërisht që nga pavarësia, e cila është vetëm 15 apo 16 vjet më parë, unë vij këtu dhe çdo herë mbetem i impresionuar. Jam i magjepsur nga mrekullia që është zhvilluar këtu. Për ata prej jush që ndoshta nuk udhëtojnë aq shumë sa unë, ndoshta nuk keni përvojën që kam pasur duke udhëtuar nëpër botë dhe duke treguar vendeve, popujve, atë që përfaqëson Shtetet e Bashkuara ose atë që përfaqëson demokracia. Unë vij këtu dhe zbuloj se ajo që është zhvilluar në vetëm 15, 16, 17 vjet nga populli i Kosovës, nga ju, është diçka që është mrekulli. Sipas vlerësimit tim, mendoj se mund ta provoj nëse do të më kërkohej të provoj, besoj se Kosova, ashtu siç është strukturuar tani dhe siç funksionon tani, është pa dyshim ndër vendet më demokratike në botë”, shtoi ai.
