Fluksi i bashkatdhetarëve që po lëshojnë Kosovën pas festave ka bërë që edhe mëngjesin e sotëm të krijohen pritje të gjata në disa nga pikat kufitare me Serbinë.
Sipas të dhënave të fundit të orës 08:06 nga Qendra Kombëtare për Menaxhim Kufitar, situata më e ngarkuar paraqitet te Dheu i Bardhë, në Merdarë dhe jarinje.
Sipas QKMK-së, aktualisht në pikëkalimin Dheu i Bardhë, pritjet për të dalë nga Kosova kanë arritur në 30 minuta, me një kolonë mjetesh prej 300 metrash. Situatë e deri diku e ngjashme është edhe në Merdarë e Jarinje, ku ndonëse pritja sipas sistemit llogaritet mes 15-20 minutave, kolona në dalje është zgjatur.
Në pikat e tjera kufitare si Vërmicë, Hani i Elezit, Kullë dhe Muçibabë, qarkullimi vazhdon normalisht dhe pritjet në hyrje-dalje janë minimale, nga 3 deri në 5 minuta.
Ditën e djeshme pritjet në Merdarë dhe te Dheu i Bardhë ishin edhe më të gjata.
