Të paktën gjashtë persona u vranë dhe 21 u plagosën në një sulm që shënjestroi një xhami në qytetin e Homsit, qyteti i tretë më i madh i vendit, gjatë namazit të së premtes në Siri, sipas autoriteteve lokale.
Imazhet e publikuara nga agjencia shtetërore e lajmeve SANA tregojnë gjurmë gjaku në qilimat e xhamisë, vrima në mure, dritare të thyera dhe dëme nga zjarri.
Xhamia Imam Ali ibn Abi Talib ndodhet në një zonë kryesisht alevite të lagjes Ëad al-Dhahab në Homs. Mediat vendase bëjnë të ditur se hetimet paraprake tregojnë që brenda xhamisë janë vendosur pajisje shpërthyese.
Autoritetet po kërkojnë ata që janë përgjegjës për sulmin. Ministria e Brendshme Siriane tha në një deklaratë se një kordon sigurie është vendosur rreth xhamisë.
Tensionet janë rritur në disa pjesë të Sirisë në javët e fundit, ndërsa përçarjet e gjata sektare, etnike dhe politike vazhdojnë të destabilizojnë vendin, edhe pse luftimet në shkallë të gjerë janë qetësuar. Vendi ka përjetuar disa valë përleshjesh sektare që nga përmbysja e Presidentit Bashar Assad vitin e kaluar, pas sulmeve nga kryengritësit e udhëhequr nga grupi islamist Hayat Tahrir al-Sham (HTS), i kryesuar nga Presidenti aktual i përkohshëm Ahmad al-Sharaa.
Asadi, vetë një alavit, iku në Rusi. Anëtarët e sektit të tij i janë nënshtruar represionit. Në mars, një pritë nga mbështetësit e Asadit kundër forcave të sigurisë shkaktoi ditë të tëra sulmesh sektare që lanë qindra të vdekur, kryesisht alavitë. Të hënën, shpërthyen përleshje midis forcave qeveritare siriane dhe luftëtarëve të udhëhequr nga kurdët, Forcave Demokratike Siriane, në lagje të përziera të qytetit verior të Alepos, duke detyruar mbylljen e përkohshme të shkollave dhe institucioneve publike dhe duke i detyruar civilët të strehoheshin në shtëpitë e tyre. Një armëpushim u njoftua nga të dyja palët vonë atë mbrëmje, si pjesë e përpjekjeve të vazhdueshme për të arritur qetësimin e situatës
