Presidenti ukrainas, Volodymyr Zelenskyy, arriti të hënën në Paris për bisedime me homologun e tij francez, Emmanuel Macron, në kuadër të përpjekjeve diplomatike për një armëpushim në luftën që po vazhdon gati katër vjet në Ukrainë.
Vizita e Zelenskyy pasoi një takim në Florida mes zyrtarëve ukrainas dhe amerikanë, të cilin Sekretari i Shtetit, Marco Rubio, e konsideroi produktiv. Palët po punojnë për rishikime të një plani të propozuar nga SHBA-ja, i kritikuar për t’u dukur i favorshëm ndaj kërkesave ruse.
Kritikat ishin veçanërisht të forta nga aleatët evropianë të Ukrainës, të cilët mirëpritën përpjekjet amerikane për paqe, por kundërshtuan pika kyçe të planit.
Zyra e Macron bëri të ditur se gjatë takimit të hënën do të diskutohet për kushtet e një “paqë të drejtë dhe të qëndrueshme.”
Presidenti amerikan Donald Trump e ka minimizuar kuadrin 28-pikësh të paqes, që do të vendoste kufizime për ushtrinë ukrainase, ndalonte anëtarësimin në NATO dhe kërkonte dorëzimin e territoreve, duke e quajtur si një “koncept” për t’u përpunuar.
Macron ka bërë thirrje që aleatët perëndimorë t’i ofrojnë Ukrainës garanci të forta në rast të armëpushimit ose marrëveshjes së paqes, duke mbështetur vendosjen e një “force sigurie” në tokë, det dhe ajër.
Ndërkohë, zëdhënësi i Kremlinit, Dmitry Peskov, konfirmoi se Presidenti rus Vladimir Putin do të takohet me emisarit amerikan Steve Witkoff të martën pasdite. Roli i Witkoff u vu nën vëzhgim pas raportimeve se ai kishte këshilluar këshilltarin e Putinit se si të prezantonte Trump planin e paqes. Si Moska, ashtu edhe Uashingtoni e minimizuan rëndësinë e këtyre zbulimeve. (Burimi: Euro News)
