Ish-kryeministrja e Bangladeshit është dënuar me vdekje për krime kundër njerëzimit për shkak të shtypjes së protestave të udhëhequra nga studentët, të cilat çuan në rrëzimin e saj.
Sipas mediave të huaja, Sheikh Hasina u shpall fajtore për lejimin e përdorimit të forcës vdekjeprurëse kundër protestuesve, 1,400 prej të cilëve vdiqën gjatë trazirave të vitit të kaluar.
Hasina, 78 vjeç, u gjykua në mungesë nga Tribunali Ndërkombëtar i Krimeve (ICT) në Bangladesh, pasi kishte qenë në mërgim në Indi që kur u detyrua të largohej nga pushteti në korrik 2024.
Prokurorët e akuzuan atë se qëndron pas qindra vrasjeve gjatë protestave. Hasina i ka mohuar të gjitha akuzat, duke e quajtur gjyqin “të anshëm dhe të motivuar politikisht”.
Tribunali disamujor në gjykatën vendase të krimeve të luftës në Bangladesh pritej gjerësisht ta shpallte atë fajtore, shkruan A2 CNN.
Por vendimi shënon një moment vendimtar për kombin, duke justifikuar protestat që i kishin rrënjët në zemërimin për shkak të viteve të shtypjes nën sundimin e saj.
Kjo gjithashtu përbën një sfidë diplomatike për Indinë dhe Bangladeshin. Daka ka kërkuar zyrtarisht ekstradimin e Hasinës, por deri më tani Delhi nuk ka treguar gatishmëri për t’u pajtuar – kështu që dënimi i saj me vdekje nuk ka gjasa të ekzekutohet.
Hasina kishte qeverisur Bangladeshin për 15 vjet, duke mbikëqyrur progresin ekonomik, por duke u përpjekur gjithnjë e më shumë të heshtë opozitën, me arrestime, zhdukje dhe vrasje pa gjyq të motivuara politikisht.
