Gjilani ka bërë një hap të madh drejt modernizimit të sigurisë publike. Në këtë qytet janë vendosur sisteme kamerash të teknologjisë së fundit, me rezolucion të lartë dhe inteligjencë artificiale (AI), të cilat mundësojnë identifikimin automatik të targave të automjeteve (ANPR). Ky sistem i avancuar mund të monitorojë dhe menaxhojë të gjitha kamerat e vendosura në një platformë të vetme, duke ofruar një nivel sigurie të pashembullt.
Kryetari i Komunës së Gjilanit, Alban Hyseni, theksoi rëndësinë e këtij investimi për qytetin dhe u shpreh i kënaqur me implementimin e sistemeve kamerash që janë të ngjashme me ato që përdoren në qytete të mëdha si Londra dhe New York.
“Kemi pranuar një donacion të rëndësishëm nga miqtë tanë në Angli për zgjerimin dhe modernizimin e rrjetit të kamerave në qytet,” tha Alban Hyseni.
Ai theksoi se ky sistem i gjeneratës së fundit, me rezolucion të lartë dhe inteligjencë artificiale (AI), mundëson identifikimin automatik të targave të automjeteve (ANPR) dhe integron të gjitha kamerat në një platformë të vetme menaxhimi.
“Për momentin, këto sisteme kamerash ekzistojnë vetëm në Londër e New York, e nga sot edhe në Gjilanin tonë,” tha Hyseni.
Kryetari i Gjilanit, më tej shtoi se një donacion shumë i vlefshëm si ky, do ta rrisë dukshëm sigurinë publike të qytetit tonë dhe është hap i madh për një Gjilan më të sigurt dhe më modern.
Ai falënderoi nga zemra për donacionin miqtë nga Anglia.
